E Lionfish cu ta un pisca invasivo, a yega Aruba na final di e prome decada di siglo 21. E ta un pisca cu ta produci lihe y no tur caminda ta uz’e den consumo. P’esey su poblacion ta crece lihe mientras cu e ta un peligro pa e piscanan chikito.
Na Aruba un grupo di hunter a trata di controla nan presencia door di organisa competencianan di pesca pa Lionfish. Pero e hunternan awo tin problema, ya cu e ekipo cu ta uza, no ta permiti pa motibo cu e ta bisa, segun ta para den ley, ta causa daño na e rifnan.
Esaki tin Patrick van Brakel, un Lionfish Hunter y doño di Lionfish Snack, preocupa. E ta mira con e poblacion di e piscanan aki crece mientras cu otronan ta bay desapareciendo. E no por drenta cu ekipo pa “hunt” e pisca aki, cu no ta laga ningun sambuyado of piscado yega cerca di dje. E speargun cu ta uza ta uno special, incluso ta yam’e pole spear, cu ta special pa Lionfish.
A combersa cu van Brakel, kende a conta cu e prome biaha cu a mira Lionfish na Aruba, cu no ta su habitat normal, tabata na aña 2009. E ta procedente di Pacifico. Un di e teorianan ta cu e negoshi di pisca di aquarium a trece e Lionfish den Caribe.
“E pisca mes no ta peligroso pero ta un peligro pa e rifnan. E ta come tur e piscanan chikito cu ta cuida e rifnan, comiendo e algen na e rif. E problema ta cu e pisca chikito no ta reconoce peligro ora cu mira e Lionfish y no tin pisca grandi cu ta come e Lionfish. Tin algun ta purba, pero door di e spina, nan ta huy. E no ta facil pa nan come un Lionfish.”
No por bisa cu Lionfish ta activo den un area so, ya cu ta haya nan tur rond unda cu tin pisca chikito.
El a bisa tambe cu normalmente ta esun cu ta trece e material pa e hunternan di Lionfish, pero ultimo aki, aña pasa, Duana a confisca e material y no a entrega esaki ainda. Mientrastanto no tin competencia pa atrapa Lionfish tampoco. Tur esaki ta haci cu e poblacion ta sigui crece cu tur e consecuencianan negativo pa Aruba su bida marino.
Pa un relato amplio lesa TREMPAN.
