Na e final di e aña aki, a reuni pa celebra mas cu solamente e transcurso di tempo. “Nos ta celebra nan dedicacion na un ofishi cu ta basa profundamente den tradicion y necesidad, un ofishi cu ta conecta nos cu nos lama y ta sostene nos bida.
Hopi storia ma bin ta tende di Aruba su piscadonan y sigur ta di admira boso tenasidad, cu den cara di desafio, e marduga- y anochinan laat cu boso ta bataya cu elementonan di naturalesa…pa trece “catch” di dia.” Palabranan expresa door di minister Ursell Arends den un reunion di fin di aña cu e piscadonan.
Tambe a honra 5 di Aruba su baluarte piscadonan pa nan tremendo contribucion na e industria di pesca.
– Nel Maduro
– Ruben Willems
– John Laurens
– Claudio Wolff
– Ronnie Dania
“Boso ta encarna e spirito di determinacion y perseverancia cu sigur nos antepasadonan por ta orguyoso di dje.
Boso trabou no solamente ta yena nos tayonan, pero tambe ta stimula nos comunidad, manteniendo e tradicion y cultura bibo.
Mientras nos ta despedi e aña aki y yama 2024 bon bini, laga nos carga cu nos e lesnan siña for di lama – e abilidad pa adapta, pasenshi y e importancia di traha hunto pa un meta comun. Paso di nos banda, nos ta kere firmemente cu maneho ta wordo traha den pueblo y cu pueblo. Danki pa boso conocemento y experiencia comparti durante e ultimo aña aki. Mi ta aprecia esaki masha. Y danki tambe na Fundacion Centro di Pesca Hadicurari pa a organisa tremendo fiesta.
Cu e aña binidero trece cosechanan abundante, cu boso subi lama y bolbe bek sigur,y tambe prosperidad pa cada un di boso.
Salud pa un aña exitoso tras di nos y pa un futuro mas briyante ainda!”
