Santa Rosa a celebra su 50 aniversario cu un actividad cu a reuni cunukeronan, productornan local y miembro di comunidad. E celebracion a combina e aniversario di e departamento cu Dia di Alimentacion, cu un variedad di cuminda crioyo prepara cu productonan local. Nathalie Maduro y Miniser Geoffrey Wever a destaca e rol di Santa Rosa den agricultura, cria di bestia y pesca pa fortifica e sector primario di Aruba.
Nathalie Maduro, directora di Santa Rosa, a expresa su satisfaccion cu e cantidad di hende cu a participa. Segun Maduro, e presencia di cunukeronan y di persona nobo ta duna un señal positivo di mas interes den plantacion y produccion local.
Pa e celebracion, Santa Rosa a invita participantenan pa uza productonan di Aruba, incluyendo pisca, cabrito y porco. Maduro a destaca cu e actividad tabata un oportunidad pa celebra e trayectoria di e departamento y, na mes momento, duna atencion na e produccion local.
Aruba mester aumenta su produccion local
Minister di Sector Primario, Geoffrey Wever, a destaca e importancia di Santa Rosa den e desaroyo di e sector primario. Segun dje, e experiencia despues di pandemia a mustra cu Aruba ta dependiente di factor externo, loke ta haci necesario pa sigui fortifica e capacidad di produccion local.
Wever a menciona cu tin actividad den diferente area, incluyendo produccion di webo, lechuga, tomati, berdura y fruta. E gobierno ta brinda sosten na e productornan y ta traha pa crea mas oportunidad pa e sector sigui desaroya.
Un di e pasonan menciona pa Wever ta e introduccion reciente di bestianan pa cria. Segun e minister, despues di mas di 14 aña sin importa genetica nobo, Aruba a ricibi un prome carga di bestianan di cria, incluyendo carne, cabrito y porco. E iniciativa ta busca fortifica e sector di cria y duna e criadonan local oportunidad pa cumpra bestianan nobo y participa den programa di reproduccion.
Pa mas lesa TREMPAN.COM.
