Awe nochi pa 11:20pm a sosode un caso di atraco net dilanti di scol EPB na San Nicolas. Ey Polis a topa cu un homber cu a conta cu e tabata cana dilanti di e scol ora diripiente dos homber a presenta riba dje di sorpresa, a puntr’e cuanto e placa e tin riba dje, a kita e placa fo’i dje y a baha na awa na pia. El a duna nan 900 florin cash, placa cu e tabatin pa paga su debenan.
Polis a yega mesora na e sitio y despues di tuma declaracion di e victima, hunto cu descripcion di e atracadonan, a sali pa e casnan di pueblo eybanda. A haci uzo di polisnan di e ekipo K-9 cu a core eybanda cu nan cachonan pa mira si por a topa cu cualkier sospechoso, pero nada.
Esaki ta di dos caso di atraco riba un solo anochi, mustrando cu e situacion ta empeorando tur dia mas. Ta pidi cualkier persona cu tin mas informacion, pa yama tiplijn di Polis mesora na 11141.
