Awe algo prome cu 11:00am a sosode un caso di destruccion na Opal # 48 na Noord. Ta trata aki di mayornan di un hoben muhe mayor di edad cu a bay atende cu un homber mayor di edad cu ta manda mensahenan pa nan yiu. Den e proceso a comete algun destruccion na e auto y cas, como un sorto di mensahe cla cu no ta acepta e acto aki den nan famia!
E dos hende muhenan a yega n’e cas y destrui auto, bentana y mas. Na e dicho adres ta biba Marshal Vinck, el a conta cu e conoce e pareha cu a haci destruccion, ta trata di Xiomara Mansur-Werleman y Izaira Mansur. Segun e Vinck, e tin keho entrega na Polis contra nan. El a duna Polis e adres unda e pareha ta biba.
Polis a sali pa e cas situa na L.G. Smith Boulevard # 548 y ey a topa cu e pickup marca Honda numera A-59852 para pafo y a atende cu ambos riba e sucedido. Tur dos a admiti di a comete destruccion na Opal # 48, nan ta di opinion cu e homber Marshal Vinck ta un pedofiel.
Polis a detene e pareha dilanti nan cas den presencia di trahado y un famia. Werleman no a gusta cu e mester bay den un dogcatcher.
“Den e auto vies aki mi tin cu bay?”, tabata palabra di Xiomara Mansur-Werleman ora cu e mester a drenta den e transporte di Polis. Prome cu el a subi e transporte, el a bisa reporteronan di 24ora.com: “Mi ta bay cera pa via di un pedofiel.”
Den entrevista cu e supuesto pedofiel, Marshal Vinck, el a conta cu no ta prome biaha cu e pareha aki ta purba di agredie, e biaha aki hasta a bay na destruccion. E tabata papia cu e yiu di Xiomara Werleman riba Facebook. E yiu, Falon Werleman tabata papia “hopi mahos” cu ne despues cu Vinck a bis’e cu e tin un “cute face”.
Dos siman pasa e pareha aki a bin agredie na su cas, el a entrega keho mesora contra nan na Polis. A puntra Vinck kico e ta opina cu Mansur ta acus’e di ta un pedofiel. El a contesta cu e no sa ken ta menor di edad of no, riba Facebook no por distingui, el a djis manda un mensahe pa Falon Werleman bis’e cu e tin un cute face, e no ta haya nada malo den esey. A puntra Vinck si e tin e mensahenan aki, pero pa casualidad el a “delete” e combersacion.