Corte Comun di Caribe Hulandes recientemente a dicta un sentencia cu un resultado hopi negativo pa e actual Minister Plenipotenciario interino di Gabinete Wever-Croes na Hulanda, esta Eddy Paris (MEP). E ta alabes e representante di Aruba na Bruselas. E tabata candidato pa MEP durante e ultimo eleccion y como resultado di reparticion di cartera entre e partidonan MEP, POR y RED, a duna Eddy Paris e puesto na Bruselas, pa defende nos interesnan den Union Europeo.
Un situacion cu a surgi entre Eddy Paris y un Banco local caminda e tabata traha, a termina den un caso civil den Corte. E caso aki a finalisa cu un veredicto sumamente negativo pa Eddy Paris. Den esaki tin un suma cuantioso envolvi.
24ora a haya confirmacion cu di berdad tabatin un veredicto, pero partidonan tin esaki hermeticamente cera. E Banco den disputa cu Eddy Paris no ta duna comentario.
Tur e caso aki tin di haber cu e periodo cu Eddy Paris tabata Senior Account Manager na e Banco local aki. Den e periodo aki a surgi algo cu a cost’e su trabou y a yega te den Corte. A pesar cu di parti di e Banco, Eddy Paris y Minister President Evelyn Wever-Croes no ta suministrando ningun informacion, por deduci di tur detaye ricibi, cu e veredicto aki ta pone un nubia hopi scur riba e posicion di e Minister Plenipotenciario di Gabinete Wever Croes na Bruselas, Eddy Paris (MEP).
Den siguiente oranan lo mira si ta tene e caso aki scondi of si lo tuma pasonan considerando e implicacion di e veredicto aki.
Por corda cu den caso di un Minister cu ni tabatin un sentencia den su contra, con e Parlamentarionan di coalicion a pasa mocion pa baha e Minister, e tempo aya. Awor ta pa mira kico ta bay pasa den e caso aki cu ta trata un funcionario publico di MEP. Ainda algun siman pasa ta papia di Integriteitskamer y cada bes mas caso ta bin ariba cu ta pone duda grandi tras di autoridad moral di e Gobierno aki pa cu e tema di integridad. Aruba henter lo ta siguiendo e caso aki di hopi cerca.
Eddy Paris a sali for di su trabou na banco y a opta pa un carera den politica. Apesar cu na un principio a consider’e un prospecto importante pa MEP, cu por bira Minister of Parlamentario, toch a dune un number te abou, esta number # 22 riba lista. Na final el a resulta e di 4 candidato cu menos voto den MEP, cu solamente 140 voto riba su nomber. E tresnan despues di dje tabatin 111, 108 y 71 voto respectivamente.