Oficina di Turismo repasando plan di promocion pa otro aña

223

Siman pasa a tuma luga un di e reunionnan anual entre ehecutivonan di Aruba Tourism Authority (A.T.A.), A.T.A. Norte America y diferente agencia y companianan socio caminda agencianan ta presenta nan strategia di mercadeo pa e siguiente aña, esaki a base di metanan, strategia pa Aruba y direccion clave presenta di parti di A.T.A. pa e aña siguiente. Representante y ehecutivonan di A.T.A., agencia di database marketing Ansira, agencia di publicidad The Concept Farm, agencia di strategia di media USIM, y agencia di PR Zimmerman Agency a participa den e reunionnan aki di dos dia cu a tuma luga na New York. Lo sigui cu diferente seccion a base di locual a discuti pa asina presenta e plannan tambe na socionan den sector priva pa dia 12 di oktober binidero, na Aruba mes. Djey lo move na ehecucion di locual Aruba lo haci pa cu e mercado di Norte America pa 2019.

Manera ta conoci, pa decadanan Norte America ta e mercado primordial cu ta trece mayoria di bishitante pa Aruba su turismo. Mester añadi tambe cu e perfil di e bishitante Mericano, a base di locual ta ingreso cu e ta laga atras, ta uno atractivo. Ta pesey tambe e ta un mercado cu ta sigui priorisa. Pa 2019 ta proyecta un crecemento di 4% pa Merca y 1.0% pa Canada, resultando den un cremento di 3.8% pa cu Norte America, den su totalidad. Esaki mas cu claro, mester traduci su mes den contribucion pa Aruba su Tourism Receipts, cual kier sigui eleva otro aña cu un crecemento di entre 3% pa 4% compara cu 2018, unda ta premira un crecemento di esaki compara cu 2017 unda Tourism Receipts a crece cu 6%.

Entre accionnan clave pa 2019 ta inclui e continuacion di duna prioridad na e mercadonan clave na Merca cu ta trece mas di 50% di bishitantenan, esta New York, Boston y Philadelphia. Pero e strategia di diversificacion na Merca tambe ta continua unda cu e servicio aereo nobo di Dallas, cu American Airlines cu lo inicia 22 di december proximo, lo wordo priorisa pa asina sigui traha riba captura mas di e parti oeste di Merca. Aki claro lo sigui enfoca riba e mercadonan cu e perfil di e bishitante desea. Lo introduci tambe diferente cambio den strategia na 2019 pa asina sigui reforsa e strategia di Aruba, esta di captura mas di e bishitante afluente. Aki lo sigui balansa atraccion di bishitante di otro perfil na momentonan puntual tambe, por ehempel ‘famianan’ cu ta biaha den temporada di verano. Aruba lo dirigi su mes na un manera mas fuerte tambe riba e mercado di destination weddings, den 2019.

Durante di e reunionnan a recapitula aspectonan clave di e perfil di e bishitante desea y su comportacion, tur aspecto cu A.T.A. ta midi y cu ta wordo uza pa tuma decisionnan clave. Informacion asina ta wordo suministra na tur agencia y ta sirbi como base pa defini accionnan anual, pero tambe pa ahusta accionnan durante un aña, ora tin mester. Pa loke ta Merca a stipula un crecemento di cantidad di bishitante afluente di 5% pa 2018 compara cu 2017. Te cu awo ta mustra cu lo logra e meta stipula. Pa 2019 a stipula un meta di crecemento di 5% den bishitante afluente compara cu 2018.

A.T.A. Aruba y A.T.A. Norte America y tur socio ta masha satisfecho cu e intercambio y resultadonan di e reunion fructifero aki, y lo sigui traha pa logra un 2019 exitoso, esaki tumando na cuenta cu 2018 ta sigui mustra fuerte pa e continente aki cu un crecemento di 7.4% te cu augustus 2018.