Entre aña 2010 y 2020, e ta sosode 20 biaha, cu un diabierna ta cay net riba dia 13. E aña aki e ta sosode dos biaha y awe ta e ultimo biaha. Na luna di april tabata e prome biaha. Mientras cu pa mayoria hende e ta “djis un diabierna mas”, pa otronan mas supersticioso, e ta un dia di masha malasuerte.
Hopi di nos ta referi na e famoso ‘Friday the 13th’, sea pa motibo di ta supersticioso of nos ta socialisa e dia aki cu e pelicula di teror den cual Jason Voorhees ta e protagonista principal. Pero kico tin enberdad tras di e combinacion di e dia aki?
Pa e comunidad Cristian Catolico, e supersticion di e dia aki ta bay atras te na e ultimo cena di Hesucristo, caminda cu tabatin 13 hende presente, esta Hesus y su 12 apostelnan, e dia aki tabata un dia prome cu e crusificacion di Hesus y ta di e manera aki nan a asocia e number 13 cu Hudas Iscariot cu manera nos sa ta e apostel cu a traiciona Hesus y e diabierna ta simbolisa e dia cu a crusifica Hesus.
Si nos observa bon, otro dos hechonan curioso ta por ehempel cu mayoria asesino den serie famoso, manera Jack The Ripper, John Wayne Gacy, Charles Manson y Theodore Bundy, tur nan nombernan tin exactamente 13 letter.
Den siglo 18, marina Britanico a purba elimina dicho creencia relata na e dia aki, nan a manda batisa un barco bou di e nomber ‘HMS Friday’, cu un capitan cu tabata yama Jim Friday. Tambe a recluta e tripulacion riba un diabierna y a baha e barco den awa riba un ‘Friday the 13th’ y nunca mas nan no a mira ni tende di e barco aki ni su tripulacion.
Aña pasa, esta aña 2017 tabatin dos “Friday the 13th”, na Januari y na October. Pa loke ta trata aña 2018 nos tin 2 ‘Friday the 13th, esta 13 di April y awe 13 di Juli 2018. Te cu aña 2020 lo tin dos “Friday the 13th” pa aña, mientras cu na aña 2021 y 2022 e lo sosode 1 solo bez pa aña, na Augustus y Mei respectivamente.
Pa nos awendia diabierna ta sinonimo di diverticion y happy hour pero e tempo nan ey diabierna tabata un dia di maldicion y mala suerte. Abo ta sinti’Bo cu suerte??
