STA ta satisfecho con negociacionnan cu Arugas a bay

Di parti di STA, Diego de Cuba, a splica cu e hecho di firmamento di CAO, ta uno hopi bunita cu Arugas. Esaki ta di tres biaha cu a firma un CAO cu Arugas. Na comienso tabata tin algun cos cu a bay un tiki stroef, pero esey semper ta pasa den un negociacion. Pero semper tabata tin e respet mutuo.

Di parti di STA ta contento tambe cu e trato cu nan a ricibi di gerencia di Arugas. Tabata tin diferencia, pero a sa di pas over di e obstaculonan aki y ta sinta un biaha mas na mesa pa asina firma un contracto colectivo pa cuater aña.

Ta un contracto colectivo caminda cu e trahadonan por conta riba un aumento substancial. Ta papiando aki di 11% pero acumulatief, e ta yega 12.5 pa 13%. Si mira tur e otro ingredientenan tambe cu a conoce aumento den e contracto colectivo aki. Por ehempel e placa di vacacion mes, caminda cu gerencia lo tin un input mas den dje. Awo e bashiepremie cu a bin erbij. Fuera di esey lo tin seguro visual y dental. Tin cu bisa cu ta un contracto colectivo cu ingredientenan hopi bon den dje. Tin e vakantieuitkering, tin e dertiendemaand y bashiepremie. E cosnan ey ta ingredientenan cu ta hopi necesario den un contracto colectivo awendia.

Arugas ta un bon compania y ta spera cu e paz laboral por reina berdaderamente den e cuater añanan proximo.

Problema laboral

Segun de Cuba, tabata tin disgusto di parti di e trahadonan. Hopi di nan ta keha riba e salario. Sa cu e situacion na Aruba no ta facil. Por dobla hero cu man, pero no por kibr’e. No ta saludabel pa keda pone presion riba un compania tampoco pa bo bay saca lo maximo posibel di dje tambe y na final di cuenta, despues di dos aña e compania tin cu declara su mes den bancarota. Esey no ta e meta tampoco di e sindicato.

STA tambe sa cu e cost of doing business awendia ta bastante pisa pa companianan. E ta trece hopi reto cun’e. No obstante esey, semper ta traha positivo y esaki ta e resultado di e negociacionnan tambe. Un resultado positivo pa ambos partido. Por bisa cu e CAO. E compania por biba cun’e y e ta un bon CAO tambe. Un continuacion di uno cu tabata bon caba y el a bira miho. E retonan ta keda grandi, segun Diego de Cuba. E no ta facil, pero awor aki cu tur trahado por keda contento. Nan ta bay conoce un mehoracion bastante formal.

Bashi Premie

E bashipremie ta mara na un suma y e ta bay mara tambe na cierto performance di e trahadonan tambe cu nan mester bay eherce. Esaki lo wordo paga cu forsa retroactivo, den e mesun siman di Januari.