Durante e periodo di dia 2 pa dia 8 di April ultimo, Flex Team a haci varios trabao di control y tambe varios intermediacion caminda cu detencion a bay.
Nan a bay na luganan conoci manera Manuelitos, Hotel Bacarat, casnan di pueblo na Noord, Madiki, casnan di pueblo na Sero Patrishi, unda cu tabata tin varios aglomeracion. Flex team a bin cu man duro riba esaki.
A controla localidadnan manera Lekker, De Olde Molen y Cas Casuela y a percura pa asina cu a cera e luganan, tur hende bay cas mas pronto posibel.
Aglomeracion na Eagle Beach
Tur grupo cu durante oranan di anochi tabata para na altura di Eagle Beach y tabata consumiendo bebidanan alcoholico, como tambe toca musica duro, polis a atende cu nan y a desaloha nan. Esnan cu di un manera of otro tabata wordo sospecha, a controla nan. E gruponan a keda te cu diadomingo anochi laat den anochi ta toca musica duro. A tolera musica riba volumen abao te cu 11’or di anochi.
Den e mesun siman aki, tabata e ultimo siman cu e campistanan por a campa riba beach. Riba diadomingo 8 di April, mester a opruim tur cos.
Aglomeracion riba parkinglot di The Village
Tur grupo cu durante oranan di anochi tabata riba e parkinglot di The Village y tabata bezig ta consumi bebidanan alcoholico, polis a atende cu nan y a desaloha nan. A controla esnan cu polis a pensa cu ta sospechoso.
Situacion na Montserat
Riba diahuebs, 5 di April, banda di 9’or y 20 di anochi, polis tabata haciendo su patruya den Riberostraat, cu ta pasa door di Montserat. na altura di e cas di e conocido Cabes di Clago, polis a mira un Suzuki Alto color di plata para bao di un mata di Kwihi. tambe a mira un homber desconoci para banda di e auto. Den e auto tabata tin dos persona. Na momento cu e homber cu tabata para banda di e auto, a mira polis, el a core bay tras di e auto y a zwaai algo cu e tabata tin den su man robes, den algun mata di aloe. Polis a baha di biaha for di auto y a bay controla. Entre algun mata di aloe, a topa cu tres saco di plastic doorzichtig, cada un cu substancia parecido na cocaina. Den cuadro di esaki, polis a detene e homber R.
Turista Irani deteni pa maltrata taxista
Riba diabierna, 6 di April, banda di 9’or y 10 di mainta, polis a bay na Renaissance Ocean Suites, pa un pelea entre un taxista un un huesped.
Eynan polis a papia cu e taxista. El a declara cu el a hiba un pareha cu nan yiunan di Renaissance Hotel y Renaissance Ocean Suites. Tambe el a declara claramente con e por a scucha na e tono di stem di e homber, con agresivo e tabata cu su casa. Tambe na caminda, e homber a dun’e un biyete di 100 dollar pa pag’e pa e rit, cual tabata costa solamente shete dollar, pero e no tabata tin placa cambia, unda cu e homber a insulta e taxista cu palabranan menos nechi. Tambe e taxista a declara cu ora cu nan a yega na e hotel, e homber a push’e dos biaha cu e porta, di manera cu e mester a bay para un banda y caminda cu e homber un biaha mas a dal e porta cera. Tambe e taxista a comenta cu el a bay reclama e homber riba e ceramento di e porta. El a declara cu e homber a bin riba dje y sin spera a push’e cu forsa, como consecuencia cu el a cay y a haya golpi na su man y brasa robes.
Polis por a mira cu e man robes di e taxista tabata hincha y tabata den un estado abnormal. Tambe e tabata keha di dolor severo na su man y brasa robes.
Den cuadro di esaki, polis a detene e homber D. naci na Iran.
Polis ta atende cu grupo di hende cu a huma marihuana bao di palo
Diadomingo, 8 di April, pa mas of menos 3’or y 40 di marduga, polis tabata controlando na altura di My Fitness Gym banda p’abao di Lekker Bar & Restaurant, unda cu nan a haya un holo fuerte di marihuana kima. Nan a mira un grupo di hende para bao di un mata di kwihi p’ariba di My Fitness Gym. Na e momento ey no tabata tin mas hende den cercania directo. Polis a dicidi di bay den nan direccion, pa asina haci un control. Saliendo for di e auto di polis, por a scucha cu a tira algo abao pa un persona, cu ta pertenece na e grupo di hendenan aki. Polis a mira un hoben tabata cana direccion di un auto staciona cu tabata para bao di e palo di kwihi. Ta trata aki di un Chevrolet cora. Polis a mira un sigaria di marihuana huma, un grinder color blauw y algo di marihuana tira abao, unda cu e hoben tabata para. Tambe bao di un auto, para banda di e auto cora, a bin haya un tas blauw. Riba e pregunta di ken e tas blauw ta, nan a contesta cu nan no sa di ken e tas ta y cu no ta pertenece na ningun di nan. A confisca e tas blauw cu contenido. A ristra e personanan di e hoben na su paña y a bin haya un saco transparente doorzichtig cu un cierto cantidad di marihuana, varios sakito cu marihuana aden y un saco di plastic cu cierto cantidad di coca y un pida pilto roos parecido na XTC. A confisca e droga haya y e grinder blauw pa mas investigacion.
Den cuadro cu esaki, a detene e sospechoso W.
Control riba parkinglot di Sporthall den cuadro cu evento di MMA
Riba diasabra, 7 di April, entre 8’or di anochi y 1’or y 20 di marduga, a tene un control riba e parkinglot di Sporthall na Santa Cruz y vecindario, pa asina evita ladronicia di auto y ladronicia for di den autonan. Parti pafo tabata tin varios security. Parti paden tabata tin un discusion entre algun persona den cuadro cu asiento. Tabata tin un pelea chikito. A core cu e partidonan for di Sporthall. Tambe na entrada un homber bao di influencia di alcohol, a cuminsa haci fastioso y finalmente a dun’e un scual y a hib’e warda. Fuera di esey no tabata tin ningun particlaridad.
Refuerso na Kustwacht pa un posibel dropping
Riba diasabra, 7 di April, banda di 10’or y 15 di anochi, a pidi refuerso den cuadro cu posibel embarcacion cu lo a baha ilegal y/of dropping tabata andando na altura di Urirama na Noord. Na Altura di Arashi, personal di Kustwacht a para polis. Nan a informa cu un contacto riba lama a a para nan personal y parce cu cuater persona tabata abordo y alabes a haya droga. Tur cos tabata bao di control y polis a bay bek Santa Cruz.
Spotcheck:
Varios luga como tambe a haci control riba varios auto. A bin confisca cantidadnan chikito di marihuana, sakitonan di cocaina, sker, cuchiu y grinder.
72 control
Den un resumen por bisa cu den e periodo di 2 di April pte cu 8 di April, flex team a tene un total di 72 control. Fuera di esey nan tabata tin 6 detencion: cuater pa droga, 1 pa maltrato y uno pa buracheria.
