Mientras cu polis tabata bezig cu un accidente cu a tuma luga na e crusada di Yami Yami na Bubali, a nota un homber manehando un Chevrolet Spark color berde pasa net riba e caminda cu e accidente a sosode, sin tene cuenta cu tabata tin auto di polis cu zwaailicht ta blokia e caminda, pa asina nan por haci nan investigacion.
E chauffeur a pasa cu su auto manera nada no a pasa. Polis a dicidi mesora pa para e auto y detene e chauffeur na e sitio mes, debi cu e tabata manehando e auto bao di influencia di alcohol y pa colmo, tabata pasa net caminda cu e accidente a sosode, strobando asina polis di haci nan trabao. A pidi pa transportwagen, pa asina transporta e persona aki na warda di Shaba.
