Pa 7 aña largo Aruba a conoce e programa di Formacion Social cu a yuda mas cu 100 hoben haya e caminda recto. Esaki a scapanan di hopi desviacion. Mayornan semper contento y lagrima den nan wowo na momento cu nan mira con nan yiu a logra cambia su bida, y pasa cu exito den e programa di Formacion Social. Prome Minister Mike Eman e tempo ey a logra convence gobierno Hulandes pa laga Marina Real hunga un rol importante den reformacion di hobennan cu dificultad den nan formacion. A crea un programa den cual e hobennan ta pasa cuater luna den un regimen estricto y disciplina y fortificacion di norma y balornan, sigui despues pa ocho luna di formacion den un ofishi. E programa aki a hasta basa riba un ley Sociale Vormings Traject cu Prome Minister Mike Eman a pasa den Parlamento na 2011. Basta riba e ley aki a bin un buro Sociale Vormings Traject den cual tin dos dama professional ta traha casi 7 aña caba y ta guia e programa di reformacion social. Tur rond di Aruba ta aprecio so tin pa e programa aki, su exito y locual e a logra pa hobennan cu tabata parce perdi. Awe e dos profesionalnan aki tambe a bira victima di e racha di persecusion di e gabinete MEP, POR RED. Ambos profesional a haya un carta cu nan trabou tambe ta wordo termina entrante 31 di January 2018. Ta parce manera cu e racha di persecusion aki no tin un final. Den su trajecto e ta lagando atras un cantidad di victim, mama y tatanan di famia sin trabou cu inhustamente ta wordo persigui politicamente. Nos a compronde cu e dos profesionalnan aki tambe hunto cu e 200 otro personanan lo ta hibando gobierno corte den un kortgeding dentro di poco. Mirando cu hopi di esnan cu a wordo retira tabata forma parti di un buro cu Formatie y Instellingsbesluit Oficial firma pa gobernador y minister concerni, tur indicacion ta cu e personanan aki finalmente lo gana nan caso. Lamentable ta cu nan mester wordo traumatiza prome y carga hopi gasto prome cu por salvaguardia nan derecho.
