Den cuadro cu e introduccion di e ‘crisisheffing’, parlamentario Daphne Lejuez di fraccion MEP ta enfatisa cu esaki no ta un escogencia pero mas bien un necesidad.
E parlamentario ta subraya cu e ta algo cu nan mester haci si nan ta sincero y responsabel pa locual ta saneamento di e deficit di nos pais.
Segun parlamentario Lejuez, e crisisheffing ta resultado di e maneho hiba pa e ultimo 8 aña, unda cu a gasta placa na tur sorto di fiesta, conferencia, costo barbaro y aumento di personal y servicio, promocion y te hasta aparentemente lo a paga dimas pa construccion di proyecto PPP di calidad inferior (considerando entre otro tur e problemanan di construccion cu Green Corridor y Hospital ta enfrentando) cu ta hiba cu nos ta comprometi pa paga pa nan pa e proximo 25-30 aña. “E introduccion di crisisheffing no ta placentero y ta algo cu nos mester pasa contra nos gusto, pero ta hacie pasobra nos si ta responsabel y kier reduci e debe y cuminsa drecha e daño haci pa e gobernantenan anterior cu aprobacion di e stempel parlement cu tawata sostene nan gobernacion 8 aña largo”, parlamentario Lejuez ta expresa.
No tin opcion
Hopi tristo cu awe mester introduci un crisisheffing a corto plaso, pero pa 2018 ta mustra cu no a laga nan cu otro opcion pa asina toch por cumpli cu e norma mas realistico di 3% proponi pa Caft, segun sra. Lejuez. E parlamentario ta sigui bisa cu ta tristo cu enbes di yuda busca solucion y mustra seriedad, fraccion di AVP ta prefera di hunga cu sentimiento di pueblo por medio di politica partidista. “Enbes di tuma futuro di nos pais y su hendenan na pecho y para responsabel pa su propio actonan cu a hiba na e situacion actual.” E parlamentario ta bisa cu e realidad ta cu si no introduci crisisheffing pa 1 juli 2018, pa cada luna di 2018 cu no introducie na tempo e lo aumenta nos debe cu rond di 10 miyon florin, anto ken lo mester paga esaki incluyendo interes?
Enbes di obstaculisa, esnan cu si ta purba busca solucion, ta invita oposicion pa aporta na un manera constructivo pa yega na solucion. Muy en particular mirando cu esaki tawata gran parti debi na nan propio gobernacion 8 aña largo cu awe a hiba nos na un debe hamas bisto, y tambe na introduccion di un Caft cu aparentemente tampoco a funciona, segun sra. Lejuez. “Mirando cu e deficit a keda aumenta enbes di wordo reduci pa falta di informacion realistico, aña tras aña, di parti di gobernacion anterior,” e ta bisa.
Saneamento
Esaki tambe ta un di e motibonan pa cual ta sostene, como pais autonomo, e introduccion di nos propio begrotingskamer. Na unda cu riba iniciativa propio y na un forma transparente, responsabel y structura, lo continua e tarea cu Caft lo mester a haci, unda cu lo sigui monitor cu e presupuestonan venidero ta cuadra cu e herstelpad y meerjaren raming acorda pa sigura cu nos ta keda riba e caminda di saneamento. Unda cu na 2021 ya nos lo por cuminsa mira un surplus pa cuminsa reduci e debe manera proponi den e Financieel Economisch Memorandum 2018-2021 cu a acompaña presupuesto 2018. Parlamentario Lejuez ta conlcui: “Mi ta spera pueblo duna nos e beneficio di duda, oportunidad y confiansa pa por sanea e situacion financiero di nos pais, y cu pueblo compronde cu nos no ta contento cu e crisisheffing. Nos lo pone todo por todo pa por elimina of reduci esaki a corto plaso por medio di busca solucion structural y duradero conhuntamente cu nos comunidad, y lo no tuma nos digno pueblo trahado haci cu spiel y cralchi.”
