Prins Bernhard Cultuurfonds lo otorga “Zilveren Anjer” e aña aki na Piet de Boer di Volendam, Hans van der Ven di Den Haag y na Alice van Romondt di Aruba. Dia 30 di mei proximo, Su Altesa Real, Prinses Beatrix, lo otorga e tres condecoracionnan aki den Koninklijk Paleis Amsterdam.
Alice van Romondt di 69 aña di edad ta masha conoci na Aruba. El a ocupa e puesto di Director di Biblioteca Nacional y tabata e prome Secretario di Conseho di Minister di pais Aruba. Te cu recien e tabata Consehera di exMinister Michelle Hooyboer-Winklaar. Pero de su tempo liber, e ta dedica hopi atención na desaroyo di cultura riba nos isla. No solamente na cultura, sino tambe na literatura y na arte en general. Ta pa e ultimo 3 balornan aki a opta pa condecor’e.
Alice van Romondt ta e di tres Arubiano pa ricibi un condecoracion asina halto for di Famia Real, esta e “Zilveren Anjer”. E prome tabata Jan Beaujon, cu a traha Cas di Cultura, sigui pa Juan (Padu del Caribe) Lampe y awor pa Alice van Romondt, como e prome hende muhe pa ricibi e distincion aki.
Desde aña 1950 ta otorga e “Zilveren Anjer” tur aña na personanan cu ta traha voluntariamente, pues sin ningún beneficio financiero, na beneficio di cultura y naturalesa den Reino Hulandes.
Prins Bernhard mes tabata entrega e condecoracionnan aki tur aña, te ora cu el a fayece na aña 2004. Desde aña 2005, SAR Prinses Beatrix der Nederlanden a tuma e tarea aki over di su defunto tata.
