Maybelline Arends-Croes ta sinti su mes profundamente honra cu e concierto di reunion di Young Voices ta dedica na dje. E gruponan aki tabata su muchanan cu el a guia desde 1978. E tempo ey, e grupo a existi dies aña largo, cantando tur caminda, train na su cas y sintiendo nan mescos cu su mes yiunan. Awo, despues di tanto aña, ta tremendo pa mira cu e mesun muchanan ey — unda algun ya ta mama y otronan ta wela caba — ta bolbe bin hunto pa un concierto di comeback.
Kende ta Maybelline Arends-Croes
Su trayectoria ta basa riba un pasion profundo pa arte y educacion. Despues di a caba Colegio Arubano, el a bay Hulanda pa studia musica, bira docente di musica y a regresa Aruba na 1968. El a traha 40 aña den enseñansa, tanto na Colegio Arubano como na IPA. Semper e tabata dedica na comunidad, participando boluntariamente den diferente actividad musical y cultural. Te ainda e ta continuamente bezig y ta lidera e coro Tutti Frutti, Melange, y ta toca cu e grupo Brindis Musical pa hende grandi. Banda di esaki, el a participa cu su muchanan den diferente festival na Aruba y ta dispuesto pa yuda unda cu tin musica.
Musica ta keda su pasion mayor. El a lanta cu musica ya cu su mayornan semper tabata gusta esaki y a permitie bay studia. E ta comparti un conseho valioso: si bo tin un pasion of un soño, bay p’e y no duda. Bo mester haci esfuerso, pasobra den tur cos ta exigi disciplina y dedicacion. Si cosnan faya na caminda, nunca no entrega; bolbe sigui p’adilanti y tuma cada bes como un les pa otro biaha hacie miho. Ademas, ta importante pa nunca kere cu bo sa tur cos, keda habri pa comparti loke bo sa y siña di tur hende.
Dia 22 di november ta Dia di Santa Cecilia, patrono di musica. Pa e motibo aki, ta haci un invitacion cordial na henter pueblo di Aruba pa bin gosa di e gran concierto aki den Renaissance Conference Center.
Pa mas detaye lesa TREMPAN.
