Dialuna mainta a habri Aruba cu varios noticia policial pa loke ta trata e fin di siman cu a pasa. Un di nan cu sigur a hala hopi atencion ta esun di dos yiu di politico conoci na Aruba envolvi den un pelea basta fuerte. Ta trata aki di un di e yiu hombernan di e lider politico Michael Williams, lider di partido Pueblo Prome y yiu homber di Minister Presidente Evelyn Wever-Croes, lider di MEP. Ambos ta mayor di edad y responsabel pa nan propio actonan.
Segun por a compronde, lo a surgi un intercambio di palabra cu a conduci na dicho agresion. Ta di remarca tambe cu dado momento, e yiu homber di Williams a tira un boter den e restaurant cu a herida e chef cortando su brasa. Ambulance a presenta na sitio pa atende cu esaki.
Den un reaccion riba e suceso, Prome Minister Wever-Croes a bisa cu lamentablemente diadomingo anochi e casa di parlamentario Gerlien Croes di AVP lo a agredi prome minister su yiu di trincion, a dal e dos biaha. Tambe e casa di e parlamentario lo a sigui e yiu homber di prome minister hunto cu su pareha den celebracion di un cumpleaños den e restaurant cu nan a bay come, y a kibra glas y destrui ful e luga.
Wever-Croes a expresa cu e ta lamenta esaki profundamente, no solamente como mama pero simplemente pa pais Aruba. A termina bisando cu aworaki e caso lamentabel aki ta den man di husticia.
