Fundacion Sinterklaas ta trahando duro p’e yegada di Sinterklaas y e evento aki ta bay ta den e normal nobo. E fundacion a haci tur esfuerso, pero door di e medidanan existente, nan a scoge pa haci e yegada virtual.
Yegada di Sinterklaas ta dia 15 di november pa 11:00 di mainta.
Lo pasa e yegada na diferente canal di television y otro medianan, asina Evelyn Frank-Maduro, vice presidente di Fundacion Sinterklaas a bisa. E dia aki lo tin e yegada live pa evita aglomeracion y tambe pa yuda cuida e muchanan di e virus. E ta algo cu no lo bay lihe y p’esey mester siña biba cu ne.
E fiesta di Sinterklaas ta p’e muchanan, di e muchanan y e fundacion ta haci nan maximo esfuerso p’e dia aki ta uno agradabel. Door di e condicion actual, nan a pensa pa hacie virtual. Segun Frank-Maduro, nan no lo divulga unda Sinterklaas ta yega pa motibo kier evita aglomeracion. Nan sa cu e muchanan kier bin wak e yegada, pero kier evita esey.
E fundacion a purba busca diferente opcion y ta haci esaki desde maart na momento cu e virus a cuminsa. Door cu nan no sa con cosnan lo sigui, no por haci nada concreto. El a splica cu e idea di core rond tabata bon, pero toch lo haya hende aglomera. Tambe no ta leuk pa simplemente core rond so, pasobra e muchanan no sa mes cu Sinterklaas a pasa. Tin di bisa ki ruta ta pasa mas of menos y esey lo haci aglomeracion. Actualmente no ta duna permiso pa actividad publico y si core rond, esey ta bira actividad publico.
Pa loke ta fiestanan di Sinterklaas na scol, esey no ta den man di e fundacion ya cu nan ta encarga cu yegada di Sinterklaas. Pero loke ta fiestanan priva, di scol, comercial, esey ta cay den sano huicio di cada hende kico nan ta desea di haci.
