Ya caba for di anochi, a cuminsa cu un control, mirando cu tin cierto reglanan cu no ta wordo respeta riba Welcome Plaza. Esey ta na entrada di waf crucero.
For di ayera caba tin cierto tourbusnan cu ta pone nan bus, siendo cu nan sa cu no mag y esakinan a wordo confisca. A cuminsa cu un control. Polis y DTP tey presente.
Lito Kock ta miembro di Cuerpo Policial y e ta conta cu esaki a cuminsa pa hopi dia caba. A bin cu un sistema di rotacion. A bin tambe cu orarionan cu por para bus, vooral dilanti di Diamonds International. Pa ley internacional di waf crucero, no por tin nada cu por ta stroba bista pa entre otro terorismo, cosnan contra turista, atraco, etc. E ta un medida di siguridad cu no mag di tin nada para eynan.
A yega na un acuerdo cu 5’or di mainta p’adilanti, por para e busnan.
Diamars a constata un bus for di 10’or di mainta para otro banda di caminda. Banda di 7’or y pico di anochi a haya como tres bus para eynan, siendo cu no tin barco. E barco a yega awe mainta. Tres auto a wordo getakel. Awe mainta a bin cu un otro control hunto cu DTP, pa tur hende tin nan papelnan na ordo, seguro, un control completo. Ki djis ta drenta den high season, y tur hende mester ta up to date. Con cu bay bin ta cu turista ta traha y si algo bay fout, nan mester ta sigura.
Na ordo
Mayoria di papelnan ta na ordo. Algun di nan ta den proceso. Esey ta DTP ta dicidi si nan mag traha of no. Tin di nan a bay busca papel bin bek. Si nan no por presenta eseynan, nan no por opera.
E area
Por a mira cu parti p’abao di e plaza, por para. Banda di Citgo no tin problema, pasobra eynan tambe tin numeracion. Eigenlijk esun cu yega 5’or di mainta pa para prome, ta bebe awa limpi. Tin un area designa cu no mag para y tin borchi cu ta indica esey. Normalmente e busnan a wordo lastra pa motibo di estorbo. No por tapa entrada di waf asina y e doñonan ta avisa.
Multa
E doñonan di bus ta bay haya un multa. Nan tin cu paga takelwagen y si nan no bay busk’e, ta 25 florin pa dia.
Tour operators
Lito Kock a splica cu e tour operatornan a crea un asociacion entre nan mes, cual ta hopi bus. Awo tin un punto pa dirigi. Aunke no ta tur hende ta miembro. Pero 90% ta miembro di e asociacion aki. E comunicacion ta hopi mas miho cu nan. Polis no ta bay eynan pa stroba ningun hende di traha, ni perhudica ningun hende. Ta djis e cosnan mester ta na ordo. Esey ta tur, segun Kock. Nan mester por cumpli cu ley. Tanten cu nan cumpli cu ley, no lo tin problema.
Mas cambio?
Kock a sigui splica cu tin mas cambio na caminda. Tin reunionnan pendiente cu cierto ministernan ainda. Manera cu por mira, entrada nobo lo bay habri. Tin cambionan cu tin nan den plan, pero mester caba di sinta cu minister pa concretisa nan.
Entrada nobo
Lo bay bin cu un entrada nobo, e no ta mucho leu di esun actual. E turistanan lo bay sali eynan, na luga di e caminda cu nan ta usando awor aki. E entrada ta keda cerca di Maritiem Politie, esey ta gate 4.
E sistema di para ta pending pa cambia. Esey ta pa e cuadra cu e rotation. Si no haci esaki, cos por bay bruha atrobe, segun Lito Kock.
