Den e cuadro di e celebracion di nan 85 aniversario, Women’s Club of Aruba ta organisando un BINGO pa recauda fondo pa nan proyectonan den comunidad. Esaki a keda anuncia pa e presidente Milagros Posner durante un conferencia di prensa.
E Bingo lo tuma luga na Club Caiquetio riba diasabra dia 26 di october cuminsando pa 7:00 p.m. E porta lo habri for di 5:00 p.m. y bar y cushina ta bon surti. Ademas di e BINGO lo tin varios “doorprizes” y un rifa di Awg. 5.00 unda por gana bunita premionan manera un “dinner for two”, un “gift certificate” di Crown Furniture Store , baskets y algun premio mas.
E prijs di e BINGO ticket ta Awg. 10.00 of por cumpra un boeki pa Awg. 100.00 Women’s Club ta hopi conoci den comunidad pa nan proyectonan manera: Dress a Child: Un proyecto pa yuda e famianan, bistiendo mas o menos 175 mucha pa e dianan di Pasco. Medio Ambiente Goes to School: E muchanan di eerste klas ta siña con pa tene nan scol limpi , nan isla limpi y pa uza un baki pa nan pan y un container reuzabel pa nan cos di bebe. Den e Pilot Project aki ta participa 4 scol: Scol Caiquetio; Bon Bini College; Scol Ora Ubao y Pastor Kraanwinkel.
Student Awards: E evento aki ta honra tur e miho graduadonan di e scolnan secundario na Aruba Siña pa bo Biba: un proyecto di conscientisacion tocante e salud di nos hende muhenan.
Nan tin por ehempel e programa di “examinacion propio” cu ta tuma luga den luna di juni y lo ripiti otro aña Ademas di e proyectonan anual, Women’s Club ta bishita regularmente nos casnan di anciano, hungando BINGO y yudando e casnan celebra e dianan di fiesta. Na edad halto, Posner a bisa, ta masha importante cu tin hendenan ta preocupa pa bo. Esnan interesa den e evento di Bingo por subi riba e Facebook di Women’s Club, busca mas informacion of bestel carchi. Women’s Club ta invita tur hende pa bin pasa un rato ameno nan nos BINGO, cu chens di gana bunita premio y a la bes cooperando cu Women’s Club pa recauda e fondonan necesario pa yuda nos comunidad. Por cumpra tickets na Optica Oduber & Kan of por yama of whatsapp na telefon 7332020 of manda mensahe na e Facebook pagina di Women’s Club of Aruba
