E lucha contra droga ta continua, Audrey Lacle-Croes a bisa recientemente den un declaracion. Addopt an Addict tin 12 aña di existencia y a logra cu hopi hende. Pero nan ta ripara cu e crisis ta hopi grandi, principalmente bou di esnan mas jong y esnan mas grandi, ta cansa, segun Audrey Lacle-Croes.

E hendenan aki kier stop. “Pero unda ta bay cu nan. A sinta y purba di uni tur e hendenan cu ta traha pa e mesun causa di adiccion, hendenan riba caya, e molester cu tin pa loke ta turista, y cu nos mes hendenan. Y e molester ta sigui.”

Croes a recorda cu hopi nostalgia e cierre di e shelter na 2009. El a corda cu e tempo ey a haci un trabou grandi di e problema di adictonan y a logra manda 97 hende pa Santo Domingo. Esaki hopi biaha no a bay den publicidad pero ta trabou grandi a haci pa logra manda e hendenan afo pa rehabilitacion. Por ehempel pa luna di october, tin 10 hende cu a bay y te na e momento aki tin na un averahe di 25 hende na Santo Domingo.

Segun Lacle-Croes, ora cu coy e averahe di aña e ta subi pa 33, e por baha un tiki kisas te na 25 persona y despues e ta subi bek. Asina e ta keda fluctua. Recientemente e organisacion tabatin un reunion na Bestuurskantoor, hunto cu ministerio di salubridad publico, caminda a splica cu e problematica aki a encera cu no por keda warda pa un respuesta kico pa haci.

El a duna e ehempel di un caso recien di un señora cu tin hopi aña den adiccion. Polis di bario a yama Lacle-Croes, notificando cu e dama aki kier bay, pero no tin vrouwenhuis. Por mand’e Santo Domingo, pero e mester kik af prome. E no tin paspoort, e mester haci testnan pa malesanan contagioso. Ta un maneho cu tin cu hiba, prome cu mandanan Santo Domingo

Hogares Creas Dominicana, tambe ta pone nan condicionnan. E inflacion tambe a subi, pues prijs tambe a subi pa tin un hende eynan, Nunca e costo ta manera na Aruba, mirando cu Aruba ta un isla hopi caro. Loke ta boga p’e, ta pa tin un luga caminda cu por hinca e hendenan ora nan pidi ayudo pa un yiu of nan mes, cu por kik nan af pa prepara nan pa bay afo. Esey pa Lacle-Croes ta un punto riba su agenda.

Resultado

Addopt an Addict ta trahando tambe riba update di nan estadisticanan. A publica e estadisticanan na 2018. Por bisa cu 100%, mientras cu 14% ta e averahe mundial, di esnan cu a bay pa rehabilita a keda bon. E problematica grandi na Aruba ta cu ora e hendenan bolbe di nan rehab, nan ta cay den e mesun seno y esey ta e problema of reto di mas grandi cu nan ta enfrenta.

Concientisacion

Aruba ta un isla cu ta biba di turismo, segun Lacle-Croes. Na prome luga nos ta papia di turismo, pa motibo cu nan ta e prome entrada. Nos mester proteha nos mes, pa e hendenan aki no wordo molestia of horta. Den e ultimo añanan a confronta cu un grupo cu ta ladronnan patologico. Por bisa cu nan tin diploma di esey, segun Lacle-Croes. E problema ta keda empeora y e hubentud aworaki ta confundi den e uzo di sea droga medicinal of recreacional.

“Nos hendenan no ta sinta wak un documental kico ta e diferencia entre droga medicinal y recreacional. Hopi hende ta bisa cu, si esey ta haci’e y e ta bay scol, e ora e ta haci mesun cos. Te hasta na scol nan ta bende droga awendia. Hopi biaha ta haya tende di esey.” Lacle Croes a bisa cu mester lucha pa e muchanan no drop-out di scol y evitacu mester yega asina leu di manda nan Santo Domingo.

Comments

comments