E reunion riba e ley di BBO na frontera a cuminsa cu un controversial retraso pa inicio di esaki. Algo programa pa 9.30 di mainta no a inicia sino te despues di 11’or. Tur esaki pasobra tabata necesario pa paga candela. Pero e contenido mes, pa algun Parlamentario, ta laga di desea. Principalmente Parlamentario Gerlien Croes cu algun tempo atras a dicidi di bandona AVP pa motibo di politica bieu, cu a resulta un biaha mas den e reunion di BBOP na frontera.
E ta admiti cu e inicio di e reunion tabata un poco emocional cu politica bieu di semper. No a cay den bon tera cerca e parlamentario aki cu Misha Raymond a bisa cu algun parlamentario ta sinta eyden pa pret. Esaki a pone cu Gerlien Croes na su turno a cuestiona si parlamentarionan di berdad ta haci nan trabou. Esaki pasobra segun calculo cu ta bisa a haci, e BBO lo trece un entrada di 40 miyon florin pa aña aden, masacrando e pueblo. Pero si e ley drenta awo, cu ta den luna di juli, e lo trece un entrada di 20 miyon den lunanan cu ta keda di 2023.
Croes no ta compronde pakico di esaki si Parlamento a caba di ricibi un presupuesto supletorio, Den esaki por lesa cu en bes di 12 miyon, ta bay haya 15 miyon florin. Pues tres miyon extra di loke a spera. Den caso di ATA a publica caba cu tabatin 42.8 miyon di entrada netto aña pasa y a calcula 30 miyon pa 2023. Pues aki caba tin 15 miyon florin extra cu ta ricibi for di e dos instancianan. Pues mas entrada di loke a calcula. P’esey e no ta compronde e necesidad pa introduci BBO na frontera, masacrando e hendenan, haci Aruba sumamente mas caro, complicando economia di Aruba, mientras cu tin entrada extra cju ta yega casi e 20 miyon cu mester pa resto di 2023.
Debi na e ariba menciona Gerlie Croes ta bisa cu el a puntra den Parlamento kende di berdad ta haci nan trabou. E ta haya cu Gobierno mes ta contradeci su mes y CFT ta bosa den su conseho algo igual. A mustra cu Gobierno ta trahando riba cifranan irealistico, riba pronosticonan economico cu no ta cuadra y no ta worry. Pero si ta prefera bay Parlamento pa pidi aprobacion pa sigui suta pueblo cu medida.”Esey nan ta bon den dje.”
Loke ta comico cu e propio Gobierno ta menciona tur e medidanan cu a bini cu ne desde 2018, redoblando entre otro e BBO. Pues un lista di medida cu pueblo ta paga pa esaki pa awo bisa cu e ley di BBO na frontera lo no crea ningun impacto pa e comunidad. “Kende ta paga pa e 20 miyon aki,.” El a puntra.
Por nota cu Croes pa e reunion aki a bini bisti specificamente na color preto pasobra ta un dia scur. “Pa hopi dia Aruba ta biba den scuridad.”
