E aña aki e comienso di Weganan Interinsular ta tuma luga na Aruba desde 29 di februari pa 3 di maart. Despues ta bay Boneiro pa 14 te cu 17 di maart y por ultimo Corsou ta di 11 pa 14 di april.
William Erasmus, IBiSA, a splica cu e weganan clasificatorio di Aruba a tuma luga caba den e Deporte Escolar cu nan a organisa. E Deporte Escolar a tuma luga na augustus te januari. Tur e teamnan cu a gana aworaki ta den training, den preparacion pa forma parti di e Interinsular, unda nan lo representa Aruba como e scolnan.
Na Aruba lo tene e deportenan di trefbal, dammen y schaak (ahedres). E weganan di trefbal ta tuma luga na Compleho Deportivo Frans Figaroa, mientras esunnan di dammen y ahedres ta tuma luga na Centro di Bario y Deportivo Dakota. E weganan cu lo tuma luga na Boneiro ta basketball 3 on 3 di scol basico, aquatlon y futbol. Na Corsou ta bay cu e weganan di basketball 3 on 3 di scol secundario, atletismo y volleyball.
Pa loke ta trata e weganan di Aruba, IBiSA tin su coordinadornan di cada deporte. Kamilah Dammers ta encarga cu e parti di organisa evento, schaak ta Esmond Jones, dam ta encarga pa Diego Kookman y Mildred Wever ta percura pa trefbal.
E weganan ta cuminsa diabierna mainta c’un apertura na Compleho Deportivo Frans Figaroa, unda tur team lo ta presente. Aki lo tuma luga un discurso di minister y asina ey ta inicia cu e weganan di trefbal, mientras ta hiba e muchanan di dammen y ahedres Centro di Bario y Deportivo Dakota p’e competencia.
E anticipacion ta creciendo mientras nos ta cerca di e Weganan Interinsular 2024. E atletanan di dammen di deporte escolar ta trahando duro bou e guia di nan coach Annelaine Jacobs. E pasion y dedicacion ta evidente mientras nos atletanan ta enfoca completamente den e mundo, strategico y habilidad preparando pa briya den Weganan Interinsular.
Nos muchanan ta demostrando un progreso impresionante danki na entrenamento pa sigura cu nan ta completamente prepara pa enfrenta nan oponentenan di Bonaire y Curaçao. E entrenamento ta programa pa e ultimo simannan prome cu e competencia cu sesionnan riba diasabra 24 di februari di 10:00 pa 11:30 am, diadomingo 25 di februari di 2:00 pa 3:30 pm y diaranson 28 di februari di 5:00 pa 6:30 pm. Cada momento ta crucial pa afina strategia y habilidad necesario pa conkista e medaya.
E federacion di dammen, situa na Sun Plaza Mall, ta e curason di e movemento di dammen na Aruba, ofreciendo un espacio ideal pa entrenamento y desaroyo di e deporte aki.
IBiSA orguyosamente ta apoya e team di dammen y ta desea tur e atletanan, lo miho durante e preparacion. E dedicacion y esfuerso di cada atleta ta un inspiracion pa nos comunidad deportivo y nos pais. Nos ta confia cu nan lo representa Aruba cu honor y orguyo, demostrando e espirito competitivo y camarada cu ta caracterisa nos isla. Nos ta invita e comunidad bin y apoya incondicionalmente nos atletanan. Laga nos anima nos team di dammen durante Weganan Interinsular 2024.
