Diahuebs, Otmar Oduber a reuni cu directora di e fundacion VeneAruba unda na un forma habri a atende riba diferente topico di interes. Un di e puntonan importante tabata e aspecto di ilegalidad na Aruba y entrada continuo di ilegalnan na nos isla.
Oduber ta bisa cu informacionnan ricibi ta indica cu calculacionnan ta mustra cu tin riba 20 mil persona indocumenta na nos isla, pero ta instancianan local lo tin cu confirma esaki. Realidad ta cu tin entre 2 pa 4 boto pa siman ta yega Aruba cu personanan ilegal, pero no ta tende autoridadnan papia riba dje y unico biaha cu ta tende ta ora tin accidentenan of incidentenan, algun di nan fatal, ta tuma luga of ora un ciudadano raporta esakinan.
Gobierno no ta papia riba e aspecto caminda tin mester hende pa e forsa laboral. Parlamento ta parce cu ta den coma riba tur tema cu lo kier papia riba dje y a para bira mas bien un vocero di gobierno y di otro banda por mira oposicion cu cada un tin nan propio agenda, pero e agenda di pueblo, di comunidad di Aruba no ta wordo sirbi.
Oduber ta contento cu e tema di scarsedad den sector laboral, cual a wordo treci dilanti pa Plataforma Nos Pais, a trece cu ne cu diferente sector den comunidad ta papiando riba dje. Relaciona cu esaki por bisa cu no tin hendenan bibando sin un dak riba nan cabes, y criminalidad ta bastante controla. Por deduci di esaki cu e personanan indocumenta ta trahando di un of otro manera, nan tin un entrada, ta huur un vivienda, ta cumpra auto etc. Hopi di e personanan aki tin mas cu 8 aña bibando na Aruba na un manera ilegal y proposicion di Plataforma Nos Pais ta pa legalisa e personanan aki p’asina nan contribui na e fondonan manera AZV, belasting, AOV etc.
