Empleadonan di laboratorio na WEB a bini hunto pa e inauguracion oficial di nan sala di reunion nombra pa ex-colega, R.H. (Robby) Solagnier, e prome Hoofd Laboratorium di Water en Energie Bedrijf (WEB) Aruba N.V..
Durante su trayectorio na WEB, entre aña 1980 pa aña 2011, esta 31 aña di dedicacion, el a ocupa e funcion di analista prome clase, Chef Laboratorium assistent y desde 1990, Hoofd Laboratorium. E ultimo funcion aki el a ocupa te dia cu el a baha cu pensioen na aña 2011.
Ta considera Robby un empleado balente y amabel. El a duna training na varios empleado den ramo di tratamento di awa. Su vision y creencia den e potencial di e laboratorio na WEB tabata clave pa e trayecto di certificacion y acreditacion di ISO pa WEB Aruba N.V.
WEB ta gradici Robby Solagnier pa su trabou y dinamismo durante su añanan di servicio. Tambe ta gradici empleadonan di laboratorio pa sigui cu e bon trabou di mantene e calidad halto di awa di bebe, reconoci mundialmente.
