Ultimo dianan riba social media tin diferente mensahe tocante trahadonan di Wardacosta di Caribe. E mensahenan ta dirigi prinicipalmente na e trahadonan di Wardacosta na Aruba caminda cu tin hasta menasa den direccion di e trahadonan. Wardacosta ta lamenta sinceramente cu e mensahenan riba social media ta atacha e trahado di Wardacosta personalmente y ta daña e reputaccion di Wardacosta sin un base funda.
Wardacosta ta un organisacion profesional cu ta traha a base di regulacionnan local y ta mantene ordo publico a base di su Rijkswet Kustwacht. E trabounan di Wardacosta ta ser ehecuta na un manera integro, profesional y sin haci diferencia den persona.
Directiva di Wardacosta ta para duro tras di su trahadonan y no ta acepta ningun sorto di menasa den direccion di su trahadonan cu ta haci nan trabou na un manera digno. Wardacosta ta e partner di siguridad riba lama pa Aruba y lo keda mantene ordo publico y controlnan riba lama a base di leynan local vigente.
