Ayera den ‘#MilesAhead’ e lider di VISHON, Miles Mercera a entrevistá Yithza Davelaar. Den un kòmbersashon ameno Miles ku Yithza a interkambiá den un forma habrí i outéntiko riba nan bida i kon nan ta mira e futuro di pais Kòrsou. Yithza a splika ku for di mucha e tabatin e pashon pa yuda hende, ku e tabata ekspresá esaki dunando muchanan ku desabilidat lès di landamentu den su tempu liber.
Yithza a sigui bisando ku ora el a kaba skol sekundario el a hasi un eskoho robes di bai studia lei, algu ku e no tabata gusta. Pa e siguiente 20 añanan el a buska den tur sorto di fishi i negoshi, kiko ta su pashon. Na momento ku el a pèrdè su mama, na aña 2014, el a realisá ku t’e mes un pashon ku e tabatin komo tiner, su kurason tabata bati p’e ainda. Einan el a kuminsá su karera yudando hende rekuperá di nan tristesa, pero tambe siña nan kon pa bira e mihó vershon di nan mes. Pa Yithza e mihó vershon di un hende ta nifiká e hende ku ta felis i outéntiko, ora bo ta felis tur kos den bo bida ta kana mihó. No tin nada mas fásil i plasentero den bida pa ta kompletamente bo mes.
Banda di su trabou Yithza tambe a lanta e fundashon Islandessa ku tin komo meta, desaroyá maestronan di skol p’asina nan por ta un influensia positivo p’e hoben, paso t’e hoben t’e futuro di nos pais. Na final di e entrevista Miles a puntra Yithza Davelaar si e ta kla pa djòin e komo vishonario, i sin duda e kontesta tabata si!
Den VISHON e ’I’ ta para p’e hende ku ta sentral. Yithza meskos k’e ‘I’ den VISHON, tambe ta enfoká riba e individuo. Si nos ke transformá presente den un mihó futuro, nos tin ku komprondé ku esaki no por sosodé sin hasi e enfoke riba e hende prioridat. Pa hopi aña e hende a wòrdu neglishá, ku tin komo konsekuensia, un degenarashon enorme di no solamente nos pueblo pero tambe nos pais.
Un país su direkshon ta influensiá p’e desishonnan i aktonan ku nos komo pueblo ta tuma. E desishonnan akí ta flui for di nos manera di pensa, loké nos ta yama nos ‘mindset’. Nos ‘mindset’ ta influensiá p’e programashon risibí na mucha, e ambientenan ku nos ta frekuentá i media òf bukinan ku nos ta lesa.
Si nos ke un mihó futuro pa Kòrsou, esaki ta nifiká ku nos tin ku tuma desishonnan i aktua diferente. Saliendo for di e ponensia ku ta nos ‘mindset’ ta dirigí esaki, nos konklushon ta ku pa un kambio real ta sumamente importante pa bini un kambio promé den mentalidat di nos hendenan.
Kiko ta influensiá e ‘mindset’ i kiko ta e ròl ku gobièrnu tin ku hunga den esaki?
Yithza Davelaar lo elaborá mas riba e tema akí den un presentashon ku lo tuma lugá djasabara, 14 di novèmber den nos Sentro Vishonario. Pa tur ku ta interesá pa presensiá e presenteshon, kòrda registrá na tempu paso e kantidat di lugá ta limitá.
