Poco pariba di e rotonde di aeropuerto, riba Green Corridor, a pidi presencia di polis pa un accidente cu despues a bira un caso di hit and run.
E chauffeur di un Kia Rio shinishi (V-4392) a sinti e golpi, na momento cu e Chevrolet spark preto (A-46658) a bin dal den dje, pero no por a kere su wowo ora cu e chauffeur a sigui core. El a tuma e salida for di e rotonde bay ariba, direccion Sero Teishi y aki ta caminda cu e chauffeur femenino aki a dicidi di baha caminda y staciona e auto na e parada di bus.
A cuminsa un intercambio di palabra pero su decision tabata tuma caba. E di: Pia pa ki mi tin bo! El a sali na careda y bandona sitio na pia. Na yegada di polis e unico cu tabata presenta tabata e victima cu a logra conta tur locual a caba di tuma luga.
Muy probablemente despues, e chauffeur aki, lo haya bishita di polis na su cas of na pia di trabou pa asina e responsabilisa su mes di su acto y e gasto cu el a ocasiona. Segun por a compronde na e sitio , cu e chauffeur aki lo no tin ningun papel na ordo y p’esey a bandona e sitio di accidente.
A pidi presencia di takelwagen un rato despues pa asina kita e vehiculo aki for di e area.
