Diahuebs anochi alrededor di 10:05 pm a sosode un accidente riba Green Corridor. Ta un poco mas pariba di brug Fredis Refunjol, unda un auto marca Nissan modelo Cube color shinishi, numera A-45907 a dal den e blokinan memey caminda pa djey bolter y keda cu dos wiel den laira.
Mesora polis y ambulance a presenta na sitio, na prome instante e chauffeur tabata for di tino, djey un rato despues el a lanta y den un forma agresivo a cuminsa grita tur e paramedico- y polisnan.
No ta conoci si el a haya sla na cabes y cu ta p’esey el a bay fo’i tino of kico ta e motibo exacto. Tabatin por lo menos dos unidad di ambulance na sitio.
A hasta pidi pa materialenwagen di brandweer pa presenta p’asina; corta e auto y rescata e chauffeur herida. Pero, nan presencia ya no tabata necesario mas, mirando cu e chauffeur a lanta riba su mes y a cana subi ambulance. E proceso pa subiment’i ambulance no a bay facil, e tabata hopi agresivo y tabata grita cu: “mi ta savage.”
E paramediconan a logra convenc’e pa nan yud’e, el a logra trankilisa y asina a logra atende cu ne riba ambulance. A transport’e pa hospital caminda e lo ricibi atencion medico avansa. E auto mes, a keda completamente destrui, e front a bay completo y a keda cu dos wiel den laira.
Polis di trafico a presenta p’asina documenta e accidente aki. Tin cu remarca cu a nota un bon cooperacion entre e paramediconan y tambe un boluntario di Rode Kruis cu tabata un di e prome nan cu a yega na sitio. No mucho ora pasa, cu a sosode un accidente na e mesun sitio, unda cu un persona a resulta herida tambe.
