Recientemente a finalisa e programa MOTI-4. Pa realisa e programa aki e team di FADA a haya un training special for di un team di Hulanda. Den un conferencia di prensa di Fundacion Anti Droga Aruba, Rulienne Arends (trahado preventivo di FADA) a papia di e beneficionan cu nan a haya caba di implementacion di e programa.
E programa aki ta dirigi riba hobennan di 14 pa 24 aña, ta brinda apoyo adicional na hobennan cu experencia cu un droga ilegal, por ehempel marihuana. Banda di esaki, e ta dirigi tambe riba hobennan cu mayornan ta sospecha tin un “adiccion” na weganan y gamblemento.
Desde juli 2020 FADA a cuminsa brinda e programa yama MOTI-4. Den cuater combersacion individual cu duracion di mas o menos un ora, e trahado preventivo ta trata di motiva e hoben pa stop cu uzo di e substancia legal of ilegal y minimalisa e uzo di video gaming cu gamblemento.
E meta principal di MOTI-4 ta pa reduci e desaroyo problematico di e uzo di substancia legal of ilegal y e comportacion ora ta trata di gamblemento y video gaming.
Mirando cu FADA ta traha den e area preventivo, awe nan por brinda e programa MOTI-4 cu ta un programa di prevencion tercera. Esaki ta hacie posibel pa ofrece ayudo inmediato.
Proceso
E intervencion ta consisti di 4 combersacion individual di mas o menos un ora pa siman cu ta wordo haci pa medio di un trahado preventivo. Den e intervencionnan aki, e trahado preventivo ta haci uzo di diferente metodo, tools y actividad cu e meta pa motiva e hoben pa reduci e uzo di gamblemento of videogaming y stop e uzo di substancia legal of ilegal.
Combersacion 1: Crea relacion di confiansa y inventarisa e problema
Combersacion 2: Informa tocante substancia of obheto y haya un bista di su uzo.
Combersacion 3: Motiva/fortalece hoben y busca otro alternativa
Combersacion 4: Fortalece, conseha y mand’e pa otro instancia (si ta necesario)
Con un hoben ta bin na remarca
MOTI-4 ta pa hoben cu a cuminsa experimenta cu e uzo of cu ta na comienso di un problema cu uzo di substancia legal of ilegal, videogaming y gamblemento.
Un mayor, miembro di famia, un maestra/o of cabesante di scol, por yama FADA na 5832999 pa asina traha un afsprak pa e hoben.
Na final di e programa, e trahado preventivo lo traha un cita cu e persona encarga pa duna un reportahe di entre otro con e programa a bay y cual ta e palabracion haci of si ta necesario
pa e hoben wordo manda pa otro instancia.
