Recientemente Rino Hermans, director di Bureau Rampen Bestrijding (BRA) a invita mando policial pa nan pasa busca e van nobo cu a yega for di Merca pa Aruba. Ta trata aki di un bus special pa e seccion “Mobiele Eenheid” of conoci den boc’i pueblo como “Riot Comando”. Hulanda a manda fondo special pa Aruba durante calamidad di covid y e tempo ey Hermans a pensa cu ta bon pa uza parti di e miyones cu nos pueblo a haya regalo, pa por cumpra ekipo cu falta pa polis.
A bestel un van traha na Merca, cu a costa mas o menos 300 mil Dollar Mericano, pa prepar’e ba gusto di nos cuerpo di polis. Mobiele Eenheid tin un rol importante den mantene orden publico y p’esey a adkiri e bus aki, cu ta cumpli cu tur e rekisitonan pa nan propio siguridad y pa por mantene orden y siguridad pa tur esnan na un evenemento di massa.
Den e bus a bin jacketnan bulletproof, camara, heat sensors y di paden e polisnan lo por mira kico ta pasa pafo y por ta miho prepara pa nan propio siguridad.
Contrario na loke Minister Rocco Tjon ta bisa, e proyecto aki NUNCA tabata riba presupuesto di Ministerio di Husticia ni di Cuerpo Policial Aruba, sino ta parti di un donacion substancial di e pueblo di Hulanda, na fondo di calamidad, pa nos pais. Pesey ta BRA a maneha e placa aki pasobra nan so Hulanda ta confia cu e placa lo yega su destinacion.
Aunke cu Altocomisario Ramon Armhem a tuma e bus, e berdad ta cu e proyecto aki no ta di dj’e, sino di e altocomisario prome cu ne. Y separa di Cuerpo Policial Aruba, tur otro entidad den e “vreemdelingenketen” tambe a haya regalo, manera IASA (Migracion Aruba), Guarda nos Costa y DIMAS.
