Den fin di siman tras di lomba a tuma luga e popular Miami Marathon. A tuma nota cu un grupo grandi di Arubiano a participa den e evento deportivo aki. E evento tabata consisti di dos categoria. E marathon completa cu ta mas o menos 26 miya y half-marathon cu ta 13 miyon.
Por bisa cu di e forma aki e bandera y pais Aruba a resalta den e miles di participantenan. Un di e participantenan tabata John Lejuez, kende ta sinti cu toch tin algun cos cu a bay fout, pero cu no tabata un desaster tampoco. Lejuez conoce e ruta aki pasobra el a participa mas cu un biaha. “E aña’ki no tabata facil. Tin algun cos a bay fout pero mi a logra yega final toch,” John a comenta.
“Mi ta satisfecho. Caba e ruta caba ta un satisfaccion pa mi,” el a bisa.
Awo den un luna di tempo e ta cuminsa su training pa KLM Marathon pa despues sigui pa Amsterdam of New York. E no por bisa ainda den cual di e dos competencianan aki e lo bay participa.
Pa Michael Maduro e ta un experencia completamente nobo. E ta recorda cu semper John ta invit’e pero nunca a yega na participa. Na Aruba e ta core distancianan di 10 pa 21 KM. “E añaki el a logra convence mi pa core e marathon.”
Prome cu a biaha pa Miami a pasa den un entrenamento intensivo di 15 siman largo. E prome meta di e grupo, di cual mayoria tabata di Eagle Runners, tabata pa yega final. Y a logra esaki tambe. El a cuminsa bon pero na di 26 kilometer e no por a wanta su ritmo mas, debi na crampnan cu el a cuminsa sinti den su pianan. Aki ta caminda cu el a cuminsa baha velocidad. Na final el a logra yega final den tres ora y 31 minuut.
E ruta mes tabata uno yen di reto. Na salida caba ta topa cu e brug cu mester pasa riba dje, y ta exigi un poco di esfuerso extra.
Pa Ikel Lopez e tabata un experencia grandi, esta core su prome marathon y na Miami. “E tabata algo diferente pero mi a tuma hopi tempo pa prepara mi mes pa esaki tambe,” Lopez a comenta. Ta hopi kilometer pa siman nan ta core. Lopez a yega di core half marathon den pasado y esaki ta su prome Marathon.
Pa sigur tres di e participantenan di Aruba, e evento di Maimi tabata un bon training pa sigui den otro competencianan internacional. Pa Jason Colina, esaki ta un bon preparacion pa su siguiente meta, cu ta e marathon di Chicago. Aunke e evento a bay bon, na final el a sinti’e basta cansa. E mes ta pensa cu kisas el a sali mucho duro.
Si train pa un periodo, tur hende lo por participa den un marathon, segun Colina, ya cu e participante mas bieu tabatin 91 aña.
Mark-Benson Denz, di 24ora.com, ta na Miami cubriendo e evento aki.
