Diabierna atardi, dia 19 di augustus 2022, FCCA a presenta un logo completamente nobo y a anuncia nan campaña pa “Smart Mortgage Event” cu ta start den luna di september proximo.
Durante e temporada recien, FCCA a conoce hopi cambio interno na unda a centralisa nan oficina y a haci cambio necesario pa bay cu e tempo y nan cliente. A yega momento pa refleha esaki den imagen pa publico door di e desvelacion di un logo nobo.
Julie Wever Director Tecnico y Comercial di FCCA a hiba palabra na ocasion di e presentacion di e logo nobo di FCCA p’e miembronan di prensa, stakeholders y invitadonan.
Wever a expresa di ta hopi satisfecho di mira con e cambionan interno a tuma luga pa centralisa e institucion FCCA cu meta nobo. “Nos a cambia nos manera di traha completamente den e sentido cu ta enfoca mas riba e cliente y kico tur e cliente mester pa nos por traha miho pa topa cu nan expectativanan”, segun Wever.
E slogan cu FCCA ta trahando cu ne ta: “Nos t’ey pa yuda bo”, Wever ta enfatisa.
Wever: “Nos ta traha cu nos historia y balor pa bin cu manera nobo y cu ta funciona cu e comunidad di Aruba. Pa e motibo aki tambe a considera loke ta tipico di e casnan Arubano den e diseño di nos logo nobo.”
E team di FCCA a scoge un logo cu ta basa riba tegel di vloer autentico uza na Aruba y Caribe cu e colornan geel y blauw. E color geel tambe ta refleha e elementonan den nos naturalesa manera flor di kibrahacha, nos barica geel y solo di Aruba. E blauw licht y donker ta refleha e diferente colornan blauw di nos lama.
E icono di e logo a cambia tambe den uno sumamente actualisa y ta representa e “emprenta” di un bloki cu ta uza pa traha un cas, visualisando tambe diseño di 4 dak di cas uni na otro den simbolismo di comunidad. Tur e elementonan aki ta refleha FCCA su presencia den comunidad ya pa mas di 40 aña, nos ta un fondo solido y autentico.
“Despues di awe, na mes momento cu nos ta desvela e logo nobo aki, e proceso di re-branding di FCCA ta cuminsa. Nos website y pagina di Facebook y tur otro medio di comunicacion lo tin nos identidad nobo. Esaki ta inclui e edificio- y vehiculonan di FCCA pa henter Aruba por wak!”, asina Julie Wever a bisa yen di entusiasmo.
Julie Wever a haci uzo di e oportunidad di invita un y tur na e evento di “Smart Mortgage Event” cu lo tuma lugar dia 3 di september 2022, di 10:00 am te cu 7:00 pm na unda por haya sa mas di loke nan ta ofrece. Minister President di Aruba, mr. Evelyn Wever Croes tabata presente y a hiba palabra tambe na e ocasion aki na unda cu el a elogia e manera di maneho cu FCCA ta hibando cu ta alinea cu sostenibilidad y cu a tene cuenta cu e crecemento di e pueblo cu ta uno multi-cultural. Presente na e ocasion aki tambe tabata Minister di Asuntonan Economico, Comunicacion y Desaroyo Sostenibel, mr. Geoffrey Wever.