A cuminsa duna vacuna na e grupo di 60+ y esaki a sosode na Theresita Center na San Nicolas. E grupo aki ta masha importante, pa motibo cu e edad averahe di esnan cu ta drenta hospital pa ayudo ta 63 aña, prome minister mr. Evelyn Wever Croes a bisa den un conferencia di prensa.
E mandatario a cuminsa pa repasa e situacion di Aruba.
“Awe nos ta cuminsa cu e grupo cu ta hopi importante den combatimento di e crisis di coronavirus,e sta e grupo di 60+ … Esaki ta e grupo cu realmente nos kier protege, riba 60 aña.” A keda constata cu e edad averahe dies nan interna pa cuido specialisa na hospital ta 63 aña, e grupo cu COVID ta dal mas duro.
Di e grupo di esnan cu a fayece na Aruba, por a nota cu mayoria ta personanan cu tin problema di curason, riñon, presion, obesidad y diabetis. “P’esey e dia di awe t’asina importante, pa evita cu e grupo vulnerabel aki ta bay te den hospital.”
Prome cu esey el a splica cu a inicia prome cu esnan cu ta brinda salud pa sigui cu e otro grupo vulnerabel.
Unabes cu tin e grupo vulnerabel protegi, por cuminsa na flexibilisa e medidanan y reconstrui e pais. “E COVID a dal nos hopi duro. Grupo grandi ta depende di pakete di cuminda. Un di cada 5 ciudadano riba e pais ta depende di e pakete di cuminda. Aña pasa tabatin mas cu 11 mil persona cu a haci uzo di FASE y ainda tin riba 20 mil persona cu ta depende di subsidio di salario,” e mandatario a splica.
Urgencia pa cuminsa recupera economia ta enorme. Cu e vacunacion aki ta dal e prome paso. A pidi pa registra via di e APP of na un sede di MFA. Principalmente esnan riba 60 aña y esnan cu ta sufri un di e malesanan ya menciona. Pa cualkier duda, por tuma contacto cu dokter di cas. “Nos kier e Aruba bek manera e tabata prome cu COVID.”
Minister di Salud Publico Dangui Oduber tambe tabata presente na e momento cu a cuminsa cu e parti di vacunacion masal na Theresita Center na San Nicolas.
Dangui Oduber
E vacunacion cu ta cuminsa cu ne awe ta riba e grupo di riesgo no. 1 di Aruba y cual tabata importante pa cuminsa vacuna nan mas lihe posibel, e mandatario a bisa. Casi 90% di esnan di e grupo di riesgo cu haya COVID ta wordo hospitalisa. Y mas riesgo pa fayece.
E schedule traha ta mustra cu awe mester habri dos localidad di vacuna, cu ta esun na Sata Cruz y Theresita Center. E otro dosnan ta Club Don Bosco na Noord y J.F.K. Education Center, cualnan ta bira operacional despues. Ta calcula pa dia prome di maart tur cuatro localidad lo ta operacional.
Segun minister Oduber a splica, a vacuna caba mas cu 1000 persona dunadonan di cuido, y no tabatin ningun caso registra di personanan cu a bira malo of a sufri efecto secundario cu ta preocupante.
E intencion ta pa vacuna di 800 pa 1000 pa dia. Di awe pa diaranson kier vacuna 300 persona pa dia; for di diahuebs ta cuminsa pa vacuna 600 persona pa dia y entrante prome di maart cu tur 4 localidad habri y bayendo pa e otro gruponan di e 7 categorianan, , kier vacuna entre 800 y 1000 persona pa dia.
Ta apela na esnan riba 60 aña pa baha e app pa registra. Te awo tin riba 5 mil persona di riba 60 aña cu a registra caba. El a recorda cu e vacunanan cu a haya aworaki ta p’e dos gruponan primordial, dunadonan di cuido y esnan riba 60 aña. “Nos ta conseha tur esnan riba 60 aña pa registra. Nan ta esnan cu mester wordo protegi, pasobra nan ta e grupo di riesgo. E meta ta pa scapa bida di hende y esaki ta proba na entre otro Israel. ”
Ta yegando 13 mil persona cu a registra pa haya e app. E intencion ta pa na final 85% di e pueblo ta vacuna.
