Como invitado den e noticiero di Enfoke, actual minister di transporte, Ursell Arends, a conta un poco di e plataforma Raiz, cu su persona a funda na aña 2017 apenas 77 dia prome cu eleccion di e mesun aña ey. E aña aki pues e partido ta cumpliendo cinco aña y segun Arends, den transcurso di e cinco añanan aki e partido a crece y a evoluciona politicamente. Segun el a sigui conta, un politico experiencia a bis’e e tempo ey cu unabes bo bira politico, cualkier decision cu bo tuma sea ta bon of malo, “para como homber p’e consecuencianan tambe y esey mi a hiba cu mi tambe”, agregando cu tin biaha mester tuma decision menos popular, pero e ta asumi responsabilidad pa esakinan.
Mas aleu, awo cu Arends ta minister, a señala na e echo cu como politico ta sinti semper cu nan “por cambia mundo” y a puntr’e si e ta wak esaki asina ainda. Arends a bisa cu e ta convenci cu e ta bay logra esey y cu e tin un bon ekipo su tras, cu ta traha duro pa logra e metanan. Un dje proyectonan sigur cu ta resalta ta e problematica di Parkietenbos y a pone meta cu e aña aki lo cera esaki. Diabierna ultimo a presenta e resultadonan di Trash 2 Cash y por tin sigur, segun e minister, cu “nos ta bay cera Parkietenbos.”
PARTIDO RAIZ
Tai Foe Lee & Ursell Arends a funda Partido Raiz dia 9 di Juni 2017. Lider desde fundacion ta Ursell Arends y a participa dos biaha den eleccion, na september 2017 a logra 2107 voto y juni 2022 e partido a logra 5481 voto. Ideologia di Partido RAIZ ta Social, democrato, progresivo.
