E traspaso di cartera ta sigui y diahuebs Ursell Arends a ricibi e carteranan di – Naturalesa y Medio Ambiente, Serlimar, Ouderen Raad y Bienestar di Animal. Comunidad por spera cu durante di e proximo Gabinete naturalesa lo haya e atencion debido, ta e expresionnan cu prome minister mr. Evelyn Wever – Croes y futuro minister encarga cu e cartera a accentua.
Den transcurso dje periodo di formacion di gobierno, a reuni cu varios organisacion y departamento relaciona cu naturalesa y medio ambiente pa duna e sector aki e atencion debido pa asina e por ta un “well oiled machine”.
Segun Arends, a tuma nota cu comunidad tambe ta poniendo mas atencion y dunando mas importancia na e tema di naturalesa. Pues, ta na su debido momento pa gobierno duna esaki e atencion debido y necesario pa asina trece trankilidad tambe den comunidad. Dierenwelzijn tambe ta un tema importante cu lo forma parti di naturalesa, pues lo duna esaki e atencion debido.
Pa loke ta e cartera di Ouderen Raad, Arends a splica cu tambe lo atende cu e asuntonan di adulto mayor debidamente den e proximo gabinete. “Manera cu e cifranan di vergrijzing ta indica, tin mas di 25 mil ciudadano riba e edad di 60 aña. Y durante di pandemia ta netamente nos adultonan mayor hopi biaha ta esunnan cu ta wordo isola cual ta cosnan cu nos a wak y nos kier duna atencion debido”.
E grupo di persona mayor a gana hopi experiencia den bida y unabes cu nan yega na edad di pensioen, den nos pensamento, nan tin hopi mas pa sigui contribui na e bienestar di Aruba, Arends a enfatisa.
Den cuadro di Serlimar e futuro mandatario encarga a splica cu lo trece plannan di con ta bay maneha desperdicio, teniendo na cuenta un maneho cu lo beneficia naturalesa den su totalidad.
“Esaki ta e plan coherente cu e proximo Gabinete lo atende cu ne y dentro di poco lo cuminsa propone y presenta e proximo solucionnan den e maneho di e carteranan cu ta resorta bou di mi ministerio”, Arends a termina bisando.
