Keto bay Gina Luidens ta riba non actief y na cas cu salario. Esaki ta e trahado di departamento di security di Aruba Airport Authority cu a test positivo pa droga. Gina Luidens ta pareha di Diego de Cuba presidente di STA.
Diego de Cuba mes a splica cu nan no kier papia masha riba e asunto. E situacion aki ta afectando su pareha masha hopi mes. El a bay den un situacion depresivo pa motibo di e problema aki. MedWork a haci e test riba peticion di AAA mes. Nan ta haci e testnan cu e trahadonan y no cu Gina Luidens so.
Diego de Cuba ta sinti cu otro trahadonan den pasado tambe a wordo afecta pa mesun test cu no ta 100%. Su pareha no ta bebe, no ta huma y no ta uza droga. Pesey mes dificilmente e por a test positivo pa cocaina. Lo ta cualkier cos cu e ta bebe of tuma como medicamento por a pone e resultado sali asina.
Despues di e test positivo na aeropuerto, segun Diego de Cuba su casa a haci test na IMSAN y esaki a sali negativo. Mas leu Diego de Cuba a busca cu e casa a haci diferente test mas na otro laboratorio y aki tambe a sali negativo. Nan ta keda cabes frieu y sperando riba e resultado. Si na Hulanda e resultado ta positivo, nan lo bay corte contra AAA.
Tambe Diego de Cuba a splica cu nan a informa Minister Dangui Oduber riba e sistema di test aki cu no ta corecto. Airport mes ta keto y ta canando e caminda normal pa e test. E trato di AAA na Gina Luidens ta mesun duna na cualkier otro trahado. Esey nos fuente na Airport a bisa nos.
Pesey mes awor aki ta masha interesante pa mira desaroyo di e caso aki. Perde 17 aña di dienst no ta algo agradabel. Ademas e hecho cu a test positivo cu MedWork na Airport y despues negativo na IMSAN y otro labnan ta zona straño. E informacion cu Gina Luidens a test negativo na IMSAN ta Diego de Cuba mes a confirma na nos.
