Pa UPP ta un deber sagrado pa sali na vanguardia di interes di nos pueblo, apesar di no tin representacion den Parlamento. Nos a bin ta informa nos pueblo frecuentemente riba asuntonan general y muy en particular a dedica hopi atencion na Serlimar.
Informenan cu nos a bin ta ricibi den nos brievenbus, tabata indica un maneho dudoso y coruptivo na Serlimar. UPP a manda varios carta pa Parlamento y tambe pa Tweede Kamer, mientras cu un keho oficial a keda entrega dor di lider di UPP contra e ex-mandatario pa actonan di corupcion. Pa UPP Serlimar, como un compania di estado, mester keda existi y keda den man di pueblo, y no sin mas por mira con ta trata na lague sangra muri.
E ultimo informacion cu nos a ricibi ta trata cu dia 7 di november 2019 Serlimar a haci un peticion pa un compania di accountant evalua e situacion financiero di e compania. 2 di januari 2020 a haci entrega di un draft na Serlimar, pero cu ex-director di Hunta di Supervicion a haya necesario pa expande e tareanan di e investigadornan.
Remarcabel ta cu den e introducion di e rapport ta duna di conoce cu aki NO ta trata di un control formal di un accountant, tampoco nan no a haya tarea pa duna un opinion riba e proporciona pa e “mangement-team” di Serlimar, y pio ainda, ta menciona cu NO por duna ningun garantia riba CONFIABILIDAD, INTEGRIDAD NI E EXACTITUD di e cifranan cu a ser duna dor di e ex-director. Cifranan cu porcierto nos cu e ex-director a manipula e ultimo añanan, cu consentimento di gobierno POREDmep y tambe e Parlamento “nobo”, pa asina por haya ayudo financiero di gobierno.
Mientras e punto di salida ta cu e rapport lo mester sirbi como punto di salida pa un duscusion tocante Serlimar, e investigadornan ta adverti cu nan no a logra compila un impresion completo di e posicion financiero di Serlimar? Pa UPP no ta conoci pakico a haci e investigacion toch, si toch no por garantisa credibilidad ni confiabilidad di e cifranan, te pa sirbi como punto di salida di discusion. Of ta pa purba laba cabez di Otmar Oduber atrobe?
Studiando contenido di e rapport por ripara cu diferente aspecto di e maneho no a wordo menciona, lantando e sospecho cu aki probablemente esnan responsabel cu maneho y supervision di Serlimar lo tabata tin e intencion pa duna un “quasi” responsabilisacion. Nan no ni sikiera a splica pakico no tin un cuenta anual desde 2017, mientras e rapport en todo caso a mustra bon cla e derochamento di placa cu a tuma lugar e ultimo tres aña.
Sin bay mucho den detaye, pa aworki, nos mester remarca cu esnan cu a haci e investigacion a skirbi cu nan a traha a base di loke nan a wordo duna “as is”! Dicon no a haci mencion di e topico den discucion desde 2007, esta e proyecto di Bouldin & Lawson. Un proyecto cu a ser boycotea ferozmente dor di e gobierno AVPOR y despues te hasta desmantela dor di e gobierno POREDmep, y cu no ta aparece ni como hero biew como un “asset” di Serlimar. Si a haci mencion cu a gasta mas di 400 mil florin pa su desmantelacion. Esnan cu a duna e “informacion” tabata hopi selectivo den nan informacion, unda a bay den algun caso den detayes, p.e. cu na 2005 Serlimar a tuma algun lessenaar, tereno y trucknan over. Pero un detaye hopi importante cu ta e huurmento di un edificio di un amigo/sponsor di e ex-minister nan NO a duna!!
Nos por tuma nota tambe cu e debe di Serlimar a subi di 6.076.054,= florin na 2009 pa 15.847.550 florin na 2017. Un aumento di mas 160%. Cu yegada di Otmar Oduber e debe a aumenta barbaramente y yega, no spanta, na 41.199.715,= florin. Un aumento barbaro di 160% compara cu loke Benny Sievinger(AVPOR)a laga atras.!!! Pero si compara e cifra aki cu loke e gobierno di MEP y ami como esun responsabel na fin di 2009, e aumento aki ta nifica un aumento di 578%!!! E tambe tabata kier ta orguyoso di a hasi un mega-debe na Serlimar??
UPP su conclucion ta, despues di a lesa e rapport aki, mas cu nunca un berdadero investigacion forensico y independiente ta necesario na Serlimar, pa asina saca afo e maneho financiero y adminstrativo cu a wordo hiba na Serlimar SG desde 2005. Aki no ta cuestion si tabata tin fraude y corupcion, pero ken y kendenan ta esnan cu a colabora den e ladronicia aki.
Y mester haci lihe pa percura cu mas NO documentonan desaparece y/o pasa den un “shredder” pa evita cu mas cas pega candela! Mientrastanto prensa comprometi of riba payroll di gobierno ta kere por uza e rapport aki pa yuda laba cabes di Otmar Oduber. Esaki ta pone cu nos ta sinti e obligacion pa den e dianan aki, nos lo trata algun otro aspectonan di e rapport.
