Pa prome biaha na Aruba un peticion ta bay na e Comicion Union Europeo, for di enseñansa primario, pa financia un Proyecto di enseñansa. Nos mester bisa cu na mei ultimo durante e periodo duro cu nos tabata pasa den dje cual ta Covid-19, toch a drenta e gran noticia cu nos peticion a keda otorga. Tabata momento cu nos a realisa cu nos a cuminsa marca historia y a habri porta pa mas scol tambe aplica.
Awe merdia nos ta cumpli cu e tarea di ta Embahadornan di Erasmus +.
- Kico ta Erasmusplus
Ersamus+ ta e programa di Union Europeo caminda ta destina fondo pa educacion, pa hobennan y pa deporte. Actualmente e comicion tin €30 biyon destina pa 2021-2027 di cual sigur €25.9 biyon ta destina pa enseñansa y training.
Tur scol por aplica pa e fondo di Erasmusplus. Esaki por ta posibel di staff te na alumno. E por ta proyectonan cu ta ensera mobilidad y partnership cu scolnan Europa of reconoci pa Erasmus+ y tin un duracion di 2 aña. Hulanda no ta un opcion pa nos ya cu pa e comicion nos ta cay bou di Hulanda.
Meta principal ta: contribui via e strategia di crecimento, igualdad social y inclucion y asina plama e meta strategico di Erasmusplus tambe rond mundo. Mester tin desaroyo sostenibel
- Kico Erasmus+ por ofrece e scolnan?
- Maestronan, staff di scol y alumnonan por conoce enseñansa di un otro pais europeo
- Oportunidad pa desaroyo profecional pa maestronan y staff
- Expande horizonte di alumnonan, amplia nan aspiracionnan y ‘boost’ nan habilidadnan di bida.
- Conecta bo mes cu otro scolnan den Europa
- Traha vinculonan cu companianan, cu gobierno, cu organisacionnan hubenil y otro partnernan rond Europa
- Inspira alumnonan y hisa nan resultadonan curicular
- Traha hunto na e metanan nucleo nacional y traha na prioridadnan den enseñansa
- Mehora didactica di maestronan y desaroya nan habilidadnan di liderasgo.
- Fondo pa por traha na tur e anteriornan menciona
- Kico ta titulo di nos Proyecto
E titulo di e Proyecto ta: Habilidadnan digital den sigo 21 pa Aruba
Pius X School tabatin un deseo y nos tabata wak e necesidad aki den enseñansa y a tuma Erasmusplus como un oportunidad pa por yega na logra cambionan y inovacion den scol. Nos a acerca algun scol cu lo ta dispuesto pa cuminsa e aventura aki cu nos y aki ta caminda nos a forma un consorcio cu St. Franciscus College y St. Dominicus College cual ta 3 scol di SKOA y cada scol cu e ‘trekkernan’ di e proyecto.
Nos tur por a experencia cu e Pandemia di Covid-19, cu nos enseñansa a bay cu speed den e mundo digital y nos no tabata cla pa esaki. Pero nos por a mira si e importancia di e mundo digital den enseñansa den siglo 21
- Kico ta e idea di e Proyecto
E consorcio forma pa e 3 scolnan aki a aplica, como ta nos prome experencia’ pa Key Action 1. Esaki ta: Job shadowing. mobilidad di maestronan y staff. Esaki ta e fondo destina durante 2 aña pa desaroyo profecional di nos maestronan y di e cuerpo di staff. Esaki ta encera cu lo manda nos personal pa un scol den Europa. Actualmente nos tin contacto cu 4 pais cual ta Spaña, Belgica, Finland y Sweden. Di cada scol lo tin 6 persona ta haya e oportunidad y tambe nos a inclui 2 persona di nos directiva pa por cana cu nos den e proyecto.
- Ki beneficio esaki tin pa enseñansa
Esaki ta basicamente traha na e desaroyo di nos profecionalnan. Inverti den e Ser Humano, den e maestro. Aki ta crea oportunidad pa maestronan core practica of duna les na un pais den Europa. Tambe por haya training special y sigi cursonan. Cu ‘job shadowing’ nos personal di scol ta haya e oportunidad di experencia pa un periodo con e ta na un otro scol of organisacion den Europa. Wak e problemanan cu nos tin den enseñansa y con nan a resolve esakinan na nan scol. Traha hunto na proyectonan, wak didacticanan diferente. Wak ki balor agrega tin pa nos sistema aki na Aruba y den nos scolnan.
Nos ta encurasha scolnan di scol preparatorio te na por ehempel IPA, pa haci uso di e oportunidad aki. Scirbi un proyecto no ta facil pero tampoco imposibel. Nos sa cu EPI y Universidad di Aruba ta conoci cu Erasmus+ caba, pero e oportunidad eyfo ta grandi. Nos no por keda warda ki ora inovacion ta drenta nos scolnan. Nos ta papia cu e mucha ta central. Pa e mucha ta central nos mester pone e maestro central. Nos mester inverti den e maestro. Ban cuminsa traha na nos desaroyo profecional y crea oportunidadnsn pa inspira otro.
