E prome informe cu a drenta diamars na Alarm Centrale tabata pa manda un ambulance cu sumo urgencia na Renaissance Convention Center unda un señora a bira basta malo. E señora tabata den cushina preparando cuminda pa eventonan den e Convention Center. Esaki segun a wordo splica door di Edward de Cuba, Comandante di Brandweer.
Na momento cu ambulance a yega, e personal a constata cu no ta un pero basta trahado tabata keha di e mesun sintomanan: garganta ta kishiki, wowo ta pica y cabes ta draai. Mesora a pone demas autoridadnan manera Brandweer y DTI pa presenta na e sitio pasobra lo por tin un leak den e tuberia di gas. Tambe a manda pidi presencia di ams ambulance y paramedico pa atende cu tur e trahadonan.
Mientras cu Brandweer a yega na e sitio, a saca tur empleado for di e cushina y a isolanan pa nan haya aire fresco y cuminsa atende cu nan problemanan di salud. Personal di Brandweer a cuminsa pa ventila e cushina pa deshaci di cualkier gas peligroso cu lo por tabatin den aire. Despues a pasa cu e aparato cu ta midi y no a detecta nada den aire cu ta peligroso. No tabatin ningun peligro mas na e momentonan ey, ya cu a cera tur e valvenan di gas .
Gerencia di e hotel y e Convention Center a manda su personal tecnico pa haci un investigacion unda e problema a surgi.
E personal cu a bira malo despues di a haya cuido di paramediconan, a pasa den man di personal di Salubridad Publico cu a haci un di dos control., pa mira si nan por traha of mester bay cas pa descansa. “Hotel a coopera cu tur e trahadonan y a laga esnan cu kier a bay cas pa haci esaki.”
Di e total di mas o menos 30 trahadonan afecta, 4 a keda transporta pa hospital di cual por a compronde cu dos nan situacion ta basta serio.
E prome informe cu Brandweer ta dispone di dje ta mustra cu aki tabata trata di un combinacion di gas LPG (di stove) y koolmonoxide. Nan a constata cu un di e hoodnan pa absorba e aire, no tabata funcionando y posiblemente a causa cu e gas a keda den e area.
