Sergio Wolter di Quality Medical Control, ta un di e Arubianonan cu ta bibando na Colombia. Nos a topa cun’e na Bogota y aki e ta conta cu ba Quality Medical Control ta un compania cu el a cu a lanta algun tempo pasa.
E ta ofrece guia y orientacion di e miho servicio medico na Bogota, Colombia pa e pueblo di Aruba.Ta ofrece diferente pakete cu ta inclui tur cos cu na momento di bo yegad,a tur cos ta regla.
Kico e ta encera
Ta buscabo na aeropuerto unda cu lo bo haya bo propio chauffeur cu lo hibabo tur caminda cu bo tin mester, na tur bo citanan na Bogota.
Tambe ta haci e reservacion di e hotel na bo gusto. Tambe tin combenio cu e miho clinicanan na Bogota. Un di nan ta Clinica del Country. Tambe tin convenio cu fundacion Santa Fe, Clinica Marli y Clinica Chayo.
E parti humano
E clientenan ta bin un pais cu nan no conoce. Wolter a splica cu e experiencia mas bunita di e compania ta, e cara di e Arubianonan, ora cu nan sali for di aeropuerto, yega Bogota. E cara di un poco di insiguridad. Nan no ta confia Colombia, vooral si nan no a yega di bin eynan. E cara cu nan ta bay bek cun’e, esey ta algo cu ta priceless pa Wolter, pasobra nan ta bay bek cu un imagen full diferente di Colombia.
Colombia ta un pais cu ta wordo considera como insigur y peligroso. E ta manera na tur parti di mundo. Ta depende unda bo bay. Pesey QMC ta eynan, pa percura pa bo tey den tur e luganan sigur.
Pashentnan ta bin pa dos cos
QMC ta haya tur tipo di pashent. Pero e mayoria di pashentnan ta bin pa dos cos. Pa medical checkups y pa estetica, cirugia plastico. Manera cu tur hende sa, Colombia ta un pais cu ta triunfa den e ramo di estetica. QMC tin convenio cu e miho clinicanan di estetica, cu e miho ciruhanonan di Bogota, Colombia.
Pashentnan di otro pais
QMC ta haya diferente tipo di pashent. A yega di haya pashentnan for di Boston, a yega di haya hende di Texas y hasta di Hulanda. Esaki ta pashentnan cu a bay vakantie Aruba y via via a tende di QMC. Y door cu nunca a bin Colombia, a dicidi di tuma contacto cu nan.
A yega di haya un pareha Hulandes cu a haci un checkeo medico, alabes kier a bay un fin di siman na un finca di koffie, cual QMC a regla pa nan.
Checkeonan preventivo
Wolter a comenta cu ta algo hopi importante pa haci nan checkeo y hopi hende no ta haci esaki. Mayoria di hende ta bay dokter ora cu nan ta sinti nan mes malo. Pero mayoria di biaha, ora ta un caso mas erg, esaki ta laat caba. P’esey QMC kier concientisa e pueblo di Aruba, pa biba un estilo di bida mas saludabel, door di haci un checkeo anual frecuente na Colombia. Un checkeo medico na Bogota por costa rond di 1000 dollar. Cu si bo pense, no ta dje hopi pa inverti den bo salud. E checkup aki ta haci 34 diferente examen fisico, cu ta inclui electrocardiogram, mamografia pa hende muhe, checkmento di prostaat pa hende homber. Tur e examen aki cu por salba bo bida unda cu bo por descubri enfermedadnan aki den e prome fase y den e mesun siman, nan lo operabo na e clinica y por dunabo un solucion.
Sergio Wolter di QMC, sigur ta un cara local na Colombia, pa asina por asisti esnan cu ta biaha y bin Colombia pa naturalmente turismo medico.
