Autoridad a mobilisa un biaha mas awe mainta na costa. Un boto cu ilegal a drenta den ora di marduga na costa panord di Aruba. E biaha ki no tabata na Vaderpiet, ni Rincon, ni Santa di Cacho pero entre Kapel di Alto Vista cu Lighthouse na Noord. Na un boca conoci pa e piscadonan tambe como Boca Grandi. Na e un rancho yama Rancho Curason a bin haya un boto peñero ‘trompa’ bayena, boca abou gebolter na canto.
Por a tuma nota di e motornan benta un banda di e boto cu daño considerabel na nan. Aunke e boto mes tabata mustra intacto y no tabatin mucho daño. Probablemente lama bruto lo a benta e boto cant’i lama, mientras tur cos ta indica cu ta na e mes un boca aki e ilegalnan lo a drenta.
A bin encontra varios jerrycan na e sitio cu ta indicacion cu e personanan aki lo a logra yega tera. Por a mira diferente stap como tambe boter di awa cu nan ta bin cu ne. No solamente esey, a bin topa cu cuminda tambe laga atras riba beach. Ta mustra di ta trata di un grupo di hende cu a logra yega sano y salbo den ora di marduga, procedente di Venezuela.
Boto no tin nomber ni registracion, ta unicamente pa transporta ilegal y muy probablemente droga tambe den ora di marduga. A conta entre shete pa dies jerrycan cu polis a confisca na e sitio. Polis maritimo a tuma over mientras a notifica kustwacht.
Tin di bisa cu ta ciudadano den area ta esun cu a bati alarma na polis. A topa cu patruya na Kapel y asina indica unda e boca ta situa.
Un investigacion lo sigui, despues cu a confisca boto como tambe e articulonan laga atras. Trabou pa saca e boto no tabata facil. Personal di compania di takel como polis a pasa basta trabou pa maniobra y saca e boto for di eytras.
Mientrastanto gobierno, minister di husticia, a anuncia algun di pasa cu nan ta consciente di e ‘blind spot’ panord di Aruba pero cu nan lo ta trahando riba dje pa asina, mas lihe cu ta posibel, cera e area cu boto ta drentando sin cu ningun hende ta na altura di dje.
