Un mucha positivo a pone cu a manda su compañeronan di klas den cuarentena. Esaki ta loke ta pasando na Fatima College.
Despues di a haya e noticia diasabra ultimo, a cuminsa pa ehecuta e protocol pa casonan asina. A manda carta pa mayornan concerni di e alumnonan cu tabata den contacto cu e alumnonan concerni y e klasnan den cual e tabata pa haya les.
Director Franklin Richardson a splica cu ta papia aki di dos klas, algun studiante adicional mas dos docente. Pues rond di 45 persona. A informa tur esnan concerni cu ta spera nan bek, esnan poni den cuarentena aki 10 dia, amenos cu DVG y SKOA tuma otro decision.
Tur protocol y tur decision ta pasa via di SKOA, cu ta maneha e scol, y Departamento di Salud Publico cu su Crisis Team.
Den e lunanan cu a pasa tabatin diferente studiante cu a bay den cuarentena caba debi na familiarnan cu a test positivo. Pero e biaha’ki e tabata mas cerca, ya cu ta e studiante mes tabata positivo pa cual no a warda dialuna yega, sino a cuminsa mobilisa mesora. Den fin di siman tambe a haci e limpiesanan necesario pa ora cu e studiantenan yega dialuna, esaki ta di un forma sigur.
Ta haci un apelacion na mayornan pa monitor e yiunan prome cu nan bay scol. Papia cu e muchanan y puntra nan si nan ta sinti algo, principalmente si tin personanan cu nan conoce cu tin COVID.