Diasabra alrededor di 4:00pm a drenta informacion cu Minister Otmar Oduber a bira malo na Rum Reef Bar na San Nicolas. Cu auto particular a transport’e cu urgencia pa Instituto Medico San Nicolas (IMSan) pa tratamento medico. Na e momento aki e mandatario ta interna eyden ricibiendo tratamento medico, pa Dokter dicidi si ta un intervencion cu por haci na IMSan mes of si mester transport’e cu Ambulance pa Hospital.
Awe 7:00pm ta tuma luga e evento “Ban Pariba” di e grupo di carnaval di e mandatario, esta TOB Carnival Group, na Rum Reef Bar banda di Baby Beach. Na e evento aki lo corona e Reina infantil, hubenil y grandi di TOB pa Carnaval 65, presentacion di e kostuumnan y cu entretenimiento di un banda, un brassband y un DJ.
Segun fuentenan den e evento, cu dado momento Minister Otmar Oduber lo a cuminsa sinti su curpa malo y te hasta a cuminsa papia straño. Esey a pone cu esunnan presente a spanta pasobra poco dia ey caba e mandatario tabata na Venezuela cu retonan di salud, como tal a opta pa hink’e den auto mesora y hib’e Dokter na Warda na IMSan. Pafo por a nota su asistente, sperando riba dje.
