Durante un entrevista cu rector di Universidad di Aruba dr. Glenn Thode, el a papia di diferente metanan cu ta bay cumpli cu nan den e aña academico nobo cu ta bay cuminsa. Ta trata di proyectonan cu nan a bin ta trahando pa algun tempo caba riba nan.
“E aña academico aki 2019-2020, lo ta un aña academico cu pa Universidad ta bay ta interesante,” segun rector di Universidad di Aruba, dr. Glenn Thode.
E ta bisa cu nan ta bay cuminsa cu algun proyecto cu nan a bin ta trahando riba nan pa algun aña caba. Mas o menos 4 aña pasa a cuminsa cu un proceso den cual, despues cu a determina cu Aruba tin derecho di haya sosten di Union Europeo, a determina cu mester bay concentra riba tereno di desaroyo sostenibel. Banda di dje tabata kier pa tin un componente tambe di educacion y investigacion cientifico ancra den e desaroyo sostenibel. Asina Universidad, den diferente combersacion, a tuma e iniciativa pa bin cu un proyecto cu awor aki ta carga e nomber SISTEM.
Despues di a cana full un trayecto cu a dura hopi tempo, a hinca e proyecto aki di tal forma den otro cu Union Europeo tabata mira cu e ta fit cu nan metanan, nan criterionan tambe pa cual nan lo duna financiamento. Asina a logra pa haya esaki pa Aruba, a base di e proyecto presenta.
Algun luna pasa a firma un acuerdo di financiamento na Universidad mes, entre Union Europeo y pais Aruba. Den esaki tabata tin dos partner envolvi den e implementacion, esta partnernan pa implementa e proyecto cual ta e United Nations Development program y KULeuven, cu ta un universidad di Belgica cu ta hopi bon mira internacionalmente y cu ta partner di UA, pa desaroya e programa educacional y tambe e programa di haci investigacion cientifico.
Segun e rector, UA ta den full swing cu e preparacionnan pa cuminsa cu e proyecto aki conforme locual Union Europeo hunto cu pais Aruba a palabra. Dr. Thode ta contento pa bisa cu ta bay cuminsa pa lansa e proyecto aki na september venidero. Unabes cu e cuminsa oficialmente, UA lo trece esaki dilanti den media.
Awor aki UA tin nan otro proyectonan cu nan tabata pensa riba dje. Un di nan ta ampliacion di nan infrastructura, cu ta duna nan posibilidad pa tin mas espacio na Universidad mes, banda di e edificio di La Salle na Playa. Dr. Thode ta contento di bisa cu parti di e proyecto SISTEM ta cu lo renoba e edificio di Maria Convent, cu ta banda di Universidad (tras di misa na Playa), cu antes tabata ubica departamento di gobierno manera Directie Buitenlandse Betrekkingen, y un tempo tambe Museo Archeologico tabata eyden. Aki ta caminda cu United Nations Development Program (UNDP), cu ta implementing partner di UA, ta bay renoba e edificio ya menciona di Maria Convent, hayando su gloria di antes y similar na e edificio di La Salle. UA ta bay uza esakinan pa su programanan educacional y pa haci investigacionnan cientifico.
Segun e rector di UA, lo agrega algun laboratorio tambe den e area. Esaki ta crea e posibilidad cu por haci investigacionnan riba tereno di biologia, kimica, fisica, cosnan cu antes no tabata haci na Universidad di Aruba, pero cu a haya sa door di añanan cu tin un necesidad di esakinan na Aruba.
Cu SISTEM ta spera di ta completamente tambe bon acopla cu tanto e sector priva, como gobierno, como otro institutonan educacional. Ta yama esaki un Approach di Triple Helix.
Esaki ta algun di e proyectonan cu tin e team di UA hopi entusiasma na momento cuu ta prepara pa apertura aña academico nobo.
Naturalmente ta contento tambe pa mira cu registracion ta canando hopi bon. Tin programanan cu tin hopi studiante ta aplicando den nan. Por a constata cu e Academic Foundation Year, cu a start algun aña pasa, ta atrayendo hopi persona pa bin prepara nan mes pa un estudio academico via e programa aki.
Ta contento con cos ta canando.
Tin algun soño cu UA ainda tin pa traha riba nan. Nan kier realisa un proyecto cu hospital y Hoge School Zuid cual ta un otro instituto di Hulanda cu ta bon den educacion den e area di salubridad. Hunto ta spera cu por join den un cuarteto hunto cu hospital, EPI, UA zuid, hunto cu Ministerio di Educacion y di Salubridad.
Ta spera cu den futuro por lansa un programa pa educacion superior pa nursing, esta pa hendenan cu lo mester bay den verpleging y tambe kisas den futuro habri programanan den e area di salubridad of promove salud na Aruba.
Pa e proyecto di SISTEM, UA tin un lumpsum cu ta haya di Union Europeo, cual ta 13.05 miyon euro. Naturalmente no ta hay’e den un solo biaha, sino ta hay’e den fase durante un par di aña. Basicamente un tiki mas cu mita di e suma ta bay na renobacion di e infrastructura y un tiki menos cu mita, ta bay pa desaroya programanan nobo, inverti den investigacion pa e personanan cu mester haci e trabao aki.
UA tin e cantidad di placa ey, no solamente reserva, sino tin acuerdonan firma, caminda cu e prome tandanan di pago a drenta, tambe na e Implementing Partnernan. E placa aki ta bin di Union Europeo. E ta parti di loke nan ta yama European Development Fund number 11. Tur esaki ta bao di coordinacion di DEZI (Departamentonan di Asuntonan Economico). Hunto nan ta forma un grupo cu ta supervisa con e proyecto ta desaroya.
