Dialuna merdia a drenta informe di un accidente basta serio unda un UTV a bolter banda di Conchi, mesora a dirigi tanto polis, ambulans como tambe e ekipo di bombero.
Despues di basta rato ta busca den e area di Conchi sin haya nada, a drenta un otro informe cu no ta eynan e accidente ta pero ta pariba di Kapel Alto Vista. Mesora a desvia e instancianan concerni na Alto Vista. E ambulance tabata e prome cu a yega na e sitio y a nota un victima femenino di 26 aña. Tabata un turista di Bonaire cu a bini pasa un dushi vakantie na Aruba cu algun amistad y coriendo e caminda “offroad” na dado momento haciendo maniobranan cu e UTV a bolter y un di e baranan cu ta wanta e dak a cay riba e pia di e victima y a kibra esaki den un forma mahos.
E mucha muher tabata pena di dolor. E chens ta grandi cu e por perde su pia. E paramediconan di e ambulance a atende e victima cuidadosamente y cu urgencia necesario a transporte pa hospital. Te na e momentonan ey cu ambulance a presenta, polis mes no a presenta ainda na e sitio. Cuerpo Tecnico di Polis a presenta despues cu Polisnan a yega y constata cu ta trata di algo hopi serio. E tabata un accidente riba e caminda cerca di Wariruri. E famia di Bonaire a bay huur e vehiculo y net e victima tabata e unico cu a saca un rijbewijs valido y credicard como borg.
Nan kier a huur quadracer tambe pero pasobra no tabata tin rijbewijs a Sali cu un solo vehiculo cu seis persona. E victima tabata na stuur ora a huur. Despues no sa si e mes tabata na stuur ora di e accidente. E vehiculo aki ta mesun vehiculo cu e Colombiano di Cross Fit tambe a accidenta cune. E no ta un vehiculo cu ta core duro. E ta motor Diesel. Pero hendenan ta huur y haci mal chansa cu e vehiculo cu consecuencia desagradable manera esaki. Spera tur cos bay bon pa e victima.
