Camara di Comercio y Industria di Aruba (KvK) tin entendi cu Gobierno di Aruba kier pusha fase 2 di e reforma fiscal entrante 2020 pero KvK no a ricibi ningun informacion nobo riba detayes di e fase 2 y e cambionan cu gobierno lo kier introduci.
KvK a tene reunion cu Departamento di Impuesto pero no a haya ningun informacion for di Minister di Finanza y Economia riba e topico. Ta reina hopi incertidumbre cerca e comerciantenan den e pasonan cu Minister lo kier tuma.
Mester tin confiansa mutuo entre sector publico y sector priva pa asina por yuda drecha e economia di Aruba. KvK ta desea di obtene e contenido di fase 2 di e reforma fiscal. KvK ta expresa cu analisa y contribui na e contenido di fase 2 ta hopi mas importante cu ehecuta fase 2 pa por cumpli na un deadline. KvK ta opina cu dialogo riba e contenido ta di sumo importancia pa por defini fase 2.
Pa loke ta e reforma fiscal den su totalidad, KvK ta comparti e mesun pensamento cu tur e otro gremionan y ta indica cu tur e 4 fasenan di e reforma fiscal mester ta disponibel pa asina por duna un conseho holistico prome cu fase 2 drenta na vigor.
E periodo actual ta uno fastioso mirando cu ta dianan di fiesta pero KvK ta mira e importancia pa dialoga y ta pidi Minister pa percura cu por dialoga prome cu formalisa fase 2. E comerciante tin hopi incertidumbre riba kico lo bay pasa entrante 2020. Esaki ta afecta e comerciante su decisionnan si acaso e planea pa cuminsa un negoshi of tin e intencion di expande su negoshi.
KvK kier duna conseho riba e fase 2 pero esey no por ta posibel si no sa con e plachi completo ta mustra di awo te cu fase 4 di e reforma fiscal. KvK ta completamente disponibel pa discuti e puntonan di e reforma fiscal cu gobierno. Algun luna atras KvK a organisa un townhall meeting, a tene reunion cu diferente stakeholders y a ricibi diferente comentario y consehonan di empresarionan riba e topico expresando nan preocupacion y punto di bista. KvK ta kere firme den dialogo transparente y a base di e conocemento y informacion cu KvK tin riba e topico por yuda yega na un situacion favorabel tanto pa sector publico como sector priva y pa e comunidad di Aruba.
