Diabierna corte a trata un caso di matamento cu a tuma luga na november di aña pasa. E victima tabata Eddy Rincon Bravo di 19 aña y e sospechoso: Shannon Williams di 22 aña; Ka Mi Li di 17 aña y Jian Wea Li di 26 aña.
Den e caso di Wlliams e tin 2 castigo condicional pendiente y e otro dosnan tin un castigo condicional pendiente.
Na februari di aña 2021 el a haya su mes dilanti mesa berde y condena pa un caso di posesion di arma di candela. E mesun aña el a sali liber y no a keda mucho tempo afo. Na december di aña 2021 el a haya un condena di 48 luna di cual 6 luna ta condicional y 3 aña di prueba. Esey tabata un caso di atraco arma. Pero esey no a strob’e cu el a sigui den e baho mundo, te hasta pa tin arma di candela den su poder.
Loke hues no por a comprende ta cu despues cu Shannon a haya e ultimo castigo menciona, unda cu e mester a sinta mas cu tres aña, ya caba na aña 2022 e tabata liber pa bolbe comete otro crimen. No ta conoci e motibonan pa cual a dicidi di lag’e bay liber mas trempan di loke tabata e castigo impone door di corte.
Den e caso di e mucha homber Ka Min, dia 22 di october di aña 2021, pues menos cu un aña prome cu e caso di matamento, el a haya un condena di 12 luna di cual 3 luna ta condicional y dos aña di prueba. Dia 17 di februari tambe el a haya un castigo di 2 luna condicional y 2 aña di prueba. Jian Li di su banda, den luna di october di aña 2021 a haya condena di 18 luna di cual 6 luna ta condicional y 2 aña di prueba. Awo atrobe e ta haya su mes den problema cu husticia pa yuda su primo sconde un arma di candela, cu no ta esun cu cual a comete e matamento.
Fiscal a bisa cu no tin prueba pa demostra cu e dos primonan ta envolvi den e caso di matamento, esta cu nan tabatin conocemento di loke Williams su intencion tabata.
E autoridadnan no a haya e arma di candela (revolver) uza den e caso aki.
Pa fin di luna lo haya sa si corte ta bay di acuerdo cu e castigo di 19 aña pidi pa Williams y e castigo combina pidi pa Ka Min. Den e caso di Jian Li ya caba a hay’e culpabel y a conden’e na 12 luna, mas e castigo condicional cu e tabatin pendiente.
