E caso cu un grupo di (ex) empleado di Felipe Construction a entama contra nan compania no a sigui awe. Na momento cu a drenta sala di Corte, e compania a mustra Hues cu tur e trahadonan ta sigura na ENNIA. Parce tabatin un eror administrativo na Felipe Construction mes y na ENNIA, pero cu a soluciona. Cu esey riba mesa Hues a declara e ex-trahadonan como no-admisibel, consecuentemente e caso no a tuma luga.
Jose Fernandes, vocero di e grupo di ex-trahadonan di Felipe Construction, a bisa na salida cu “cosnan straño ta sigui pasa” y mas bien nan ta sinti nan mes perhudica. Nan tin un aña y mey riba e caso aki den Corte, den un bay bin y ora cu finalmente tratamento di e caso mester a tuma luga awe, e contra partido a sorprende tur hende cu un documento cu a yega na un acuerdo cu ENNIA.
Esnan cu nunca tabata inscribi, tambe ta registra awo y tin un polisa. Loke nan ta haya straño cu nan no a haya ni e polisa pa firma. Tambe nan a tende cu no a cumpli ainda cu pago di e suma completo, pero esaki ta algo cu nan abogado mr. Gravenstijn tin cu bay averigua.
No tin un bon splicacion unda e fout tabata. Ta bisa cu e sistema di payroll di e compania a comete un fout y tambe den esun di e compania di seguro di Ennia. Un storia cu e empleadonan ta haya hopi straño. “Nan no por perhudica nos pa un fout di nan,” Fernandes a bisa na final.