Hopi cu a traha cune ta bisa e ta loco. Esey no ta nos pa dicidi. Cu e sa traha bruha mal usando poder cu e tin ta un realidad. Aki nos ta referi na Trudy Hassel cu awor parce tin dos pechi. E ta mal usa ambos pechi aparentemente y aki ta comete blundernan manera esun di diabierna anochi. Na Aruba ningun hende ta contra e lucha contra ilegalidad.
Pero e mester bay segun ley y no pa loco. Loke a pasa diabierna den e barnan na San Nicolas ta un locura total. Un persona cu mester sa mihor ta comete un barbaridad cu ta mas bien un berguensa pa Guarda Nos Costa. Trudy Hassel a dicidi di planea un accion pa drenta e barnan na San Nicolas. Barnan cu tin tur nan damanan trahando legalmente. E damanan cu ta traha den bar no por drenta Aruba si nan papelnan no ta na ordo. Ademas nan mester haya ok pa bin traha na San Nicolas. Henter un proceso adelanta mester wordo encamina cu dokter na Colombia. Ora yega Aruba mescos cu Departamento di Malesanan Contagioso. Tur test cu nan haci na Colombia mester wordo ripiti na Aruba.
Ora cu tur cos ta na ordo nan por cuminsa traha. Na Aruba tur diahuebs mester pasa control di dokter un biaha mas te dia cu nan bay despues di termina nan tres luna. Jeugd en Zeden Politie ta traha hopi serio cu e asunto aki y mescos DBZ. Awor den un forma inexplicable Trudy Hassel ta presenta cu batayon di personal di GNC. E personal mes no por yuda. Nan a haya instruccion y nan ta sigui instruccion. E ta importante si pa nan mira nan limite pasobra loke a tuma lugar ta algo hopi ridiculo. Na Aruba no ta un secreto cu tin masha hopi bar trahando cu hendenan illegal. Awor a opta pa drenta barnan unda tur hende sa cu e damanan ta legal. Kiko ta e intencion di un accion asina. Ademas Trudy Hassel kier a haci fresco tambe. E kier a bay mishi cu un dama y e daman a su turno a pare tambe.
A tira man dos biaha riba Trudy Bek pa e hala y no mishi cune. Tin camara di seguridad cu a graba tur cos. E damanan aki ora nan yega Aruba, nan sa cu nan cosnan ta regla. Awor pa pasa den un trauma asina ta pone nan duda si realmente nan ta legal. Sin busca drecha of warda nan demostra nan legalidad, shon Trudy Hassel a instrui su personal pa hiba e damanan den van. Ta papia di mas cu 30 dama legalmente na Aruba a wordo hinca den e diferente vannan y bay cu nan warda. E cos mas tristo ta cu mesora esnan di Sanibar a activa nan abogado. Abogado y doñonan di bar a presenta na Guarda Nos Costa. A dura menos cu dos ora y tur e damanan tabata bek pariba. Esaki ta un beguensa. Un mal uso di poder pasobra Trudy Hassel mester sa hopi bon cu e hendenan aki tin nan papelnan. Of ora bo kier bin haci algo similar mester hacie prepara. Bin cu bo lista pasobra tur e nombernan di e damanan aki den cada bar ta registra. Dos caya patras e ilegalidad cu prostitucion ta y aki Trudy Hassel no a pasa mal usando su team pa piki hende. Ora cu Trudy Hassel a ripara cu e cos a bira cayente pe, el a core bisa cu e lo ta dispuesto pa sinta cu Sanibar na mesa.
E momento parce el a bin bij cu el a pega un barco. Ya ta laat. Esnan di bar a bisa cu e mester sali pidi un disculpa. Parce Trudy kiermen ta su trabou e ta haci. Wel e por haci su trabou pero mester haci su trabou drechi. Na Aruba tin hopi illegal y concientemente bo kier bin mal usa poder y drenta barnan unda bo sa cu e muhernan ta legal. Ademas no mester drenta un fin di siman ora ta druk cu cliente. Henter siman ta keto y mesun muhernan tey. E Accion Blunder” di Trudy a hostina hopi hende. Polisnan na San Nicolas a laga sa cu Trudy tin un rabia pasobra den pasado no por a saca hendenan yega na dje for di den bar. Awor ta manera cu e ta probecha mal usando su poder den GNC, cual como Polis e no a logra cu e mesun area. Diasabra anochi Trudy Hassel a bolbe San Nicolas cu e team di GNC. E biaha aki el a drenta e area mas patras. Esaki ta pa no perde cara di e blunder di diabierna anochi. Malgastamento di placa di pueblo esaki ta pasobra bo a bay cu mas di 30 muher legal y un rato despues bo mester a laga tur den libertad diabierna. Un berguensa grandi. Diasabra a mira algun cos mas pasando cu tambe ta cuestionable.
E forma cu GNC ta yega blokia cayanan etc ta hopi cuestionable. GNC no tin autoridad pa blokia caya pa trafico etc. Esey ta algo cu Polis por haci durante un of otro caso.,Esakinan ta actuacionnan pelligroso den bista legal. Tambe tin cierto imagen di otro casonan unda GNC ta drenta apartamento of propiedad priva cu no ta negoshi sin autorizacion. Drenta hogar forzando portanan. Esaki ta algo peligroso. Cu kier atende cu ilegalnan no ta problema pero e forma cu Trudy Hassel ta haciendo y mal usando e personal ta birando un situacion hopi cuestionable.
Den pasado caba Trudy Hassel tabata maneha GNC y e tempo ey tambe nan a haci cosnan cu no mag. Awor kizas Andin Bikker como minister a priminti Trudy Hassel un funcion y esaki ta e consecuencianan. Tur caminda Trudy Hassel a pasa caba y tur caminda a dura poco tempo. No solamente na Aruba pero tambe afo. Pesey ta haya straño con Andin Bikker por presta su mes pa pone un hende asina na un lugar cu awor ta comete blundernan asina pisa manera entre otro diabierna anochi. Den Cuerpo Policial nan ta contento cu a deshaci di dje pero awor el a yega na GNC y a cuminsa caba cu mal pia.
