Na Sabana Berde, na e oficina di Warda nos Costa, tres Venezolano ilegal a huy den oranan di marduga. Tur cos ta indica cu nan a zaag e hekwerk cu tin na e bentananan y asina nan a logra scapa. Ningun hende sa ki ora nan a scapa.
Ta mainta aparentemente nan a discubri cu nan no tey. Y asina a bati alarma. Con e zaag a yega den nan poder, esey tampoco ta conoci. Pero tur cos ta indica cu pa falta di miho control, a pone cu esaki a pasa e trahadonan voorbij. Asina e Venezolanonan a logra baha na awa.
Autoridad ta haciendo investigacion. Esaki no ta prome biaha cu ilegalnan ta huy for di e luga aki. Ultimo biaha tambe nan a kibra e mesun tipo hekwerk aki, logra los’e, lant’e y logra baha na awa. Di e tempo ey a reforsa e hekwerk. A welder cierto cosnan y pone boltsnan mas fuerte. E biaha aki, cu un zaag, cu a drenta den un forma inexplicabel, nan a logra corta y huy. Ultimo dianan aki a coy basta hende atrobe. E storia cu no ta cogiendo Venezolano ilegal, no ta berdad. Keto bay ta cogiendo hende di diferente nacionalidad, entre otro Venezolano, cu no tin nan documentonan of ta ilegal na Aruba.
Esey ta trabao di Warda nos Costa, e biaha aki tres a huy. Con peligroso nan ta, esey no ta mucho cla. Pero un cos ta sigur, nan no kier bay Venezuela. Nan a haya chens y a logra corta y huy for di e oficina di Warda nos Costa na Sabana Berde. Internamente tambe ta haciendo investigacion pa wak tiki mas leu y wak con mester haci pa evita cu mas di e hendenan aki ta huy for di e luga aki. Ta un luga nobo trabao, cu kisas mester wordo adapta. Con cu bay bin, un ilegal, no ta un criminal. No ta dun’e un luga manera un prizon. Pero di otro banda tin cu bisa cu tin cu pone di un forma cu nan no ta huy, manera ta pasando ultimo temponan aki. Y kisas e personal mester pone mas atencion ora cu nan tin hende cera pa deporta.
